Kryetari i PD-së Lulzim Basha u shpreh në një takim me qytetarët shkodranë se duhet të largohen nga qeveria ata emra deputetësh që përmenden nëpër dosje përgjimesh.
Basha iu drejtua shkodranëve duke ju thënë se midis tyre është një trafikant që akuzohet për blerje votash në dosjen 184 së bashku me dibranin Ymer Lala.
Ai gjithashtu deklaroi se opozita është shkëputur nga qeveria e lidhur me krimin për të mbërritur në destinacionin e vlerave europiane.
Basha tha se kjo qeveri ka në themel kapjen e çdo institucioni, atyre të ekonomisë, drejtësisë dhe universiteteve.
Deklarata e Bashës:
“Dora e zezë e krimit që është bërë njësh tash 6 vjet me dorën e një qeverie kriminale, që është në themel të kapjes së shtetit, siç e ilustron dhe Departamenti i Shtetit në raportin që sapo publikoi javën e kaluar. Është në themel të kapjes së çdo pushteti, në themel të kapjes së institucioneve, në themel të kapjes së ekonomisë, në themel të kapjes së universiteteve, dhe për të cilën jemi bashkuar si asnjëherë tjetër në 28 vite. Qytetarët e lirë shqiptarë, me shkodranët në ballë, dhe opozita politike, e cila duke djegur mandatet, refuzoi të jetë pjesë e këtij parlamenti të krimit, dhe ka vendosur t’ia kthejë edhe njëherë vendimmarrjen qytetarëve, përmes votës së lirë dhe të ndershme. Kjo është domethënia e betejës që kemi nisur, ndërsa destinacioni dihet, është destinacioni i vlerave evropiane, i vlerave të një shoqërie të lirë, ku gjithësecili të bëjë para përmes meritës, përmes aftësisë, përmes talentit, e në veçanti rinia ta ketë të sigurtë jetën, shkollimin dhe punësimin:,- tha Basha në nisje.
E për të ndalur avancimin e krimit, Basha tha se duhet të largohen ata deputetë emrat e të cilëve kanë dalë në dosje përgjimesh. Një i tillë tha Basha është deputet në Dukagjin. “Keni ju një trafikant deputet këtu në Dukagjin, i kapur në përgjime në dosjen 184 me Ymer Lalën për të blerë votat në Dibër. Shqipëria nuk është e nuk duhet të jetë me e Paulinëve.”
https://www.facebook.com/lulzimbasha.al/videos/328190391387633/
