Myrteza Çaushi do të përballet të premten e 17 korrikut me Gjykatën e Korçës, për të shqyrtuar provat, që do të dorëzohen prej tij, për të mbështetur kërkesën për lirimin me kusht.
Kreu i bandës së Çoles, pretendon se i ka kryer 25 vite burg dhe se kërkesa e tij është e ligjshme.
Ai është dënuar me burgim të përjetshëm për veprat penale “Krijimit të bandave të armatosura, kryerjen e krimeve nga bandat e armatosura, vrasje, rrëmbim personi si dhe mbajtje pa leje të armëve luftarake”.
Por kur kanë nisur procedurat e para ligjore për lirimin e Zani Çaushit?
Abc News zbardh vendimin e gjykatës së Korçës që mban datën 26 korrik 2019.
Trupa gjykuese e kryesuar nga gjyqtari Besnik Shahu, kanë bërë llogaritjen e qëndrimit në burg të Çaushit dhe i kanë njohur këtij të fundit 52.5 muaj paraburgim.
Togat e zeza kanë pranuar kërkesën e bërë nga Myrteza Çaushi pranë kësaj gjykate në 18 mars të vitit të shkuar.
Kreu i bandës së “Çoles” pretendon se nuk i është njohur periudha e paraburgimit nga data 30 shtator 1997, deri më 01 shtator 1999.
Çaushi e ka ngritur këtë pretendim pasi Gjykata e Tiranës kur ka bërë bashkimin e dënimeve njëri me burgim të përjetshëm të dhënë nga gjykata e Vlorës më 13 shkurt 2001 dhe dënimin nga dhoma penale e Tiranës me 18 vite burg në shkurt të 2009.
Sipas Çaushajt kjo gjykatë në shtator të 2014-ës, ka përcaktuar si datë të fillimit të dënimit pikërisht datën 1 shtatorë të vitin 1999 dhe jo nga 30 shtator i 97.
Përpara se të krijonte bandën e tij në mars të 1997, Zani Çaushi ishte arratisur nga një burg i Greqisë.
Drejtësia e vendit fqinj e kishte dënuar me 101 vite burg për disa vepra penale të ndryshme.
Gjate viteve kur veproi në Vlorë, Banda e “Çoles” e drejtuar nga Zani Çaushi ka pasur përplasje të forta me grupe të tjera rivale në zonë, si Banda e “Gaxhait”, Banda e “Kakamit” dhe Banda e “Pusit të Mezinit”.
Në atentate dhe shkëmbim zjarri mes tyre numërohen shumë persona të vrarë, mes të cilëve edhe tre vëllezër të Myrteza Çaushit. Ndërkohë në 28 dhjetor të 2019 është liruar Viktor Ymeri, ish-anëtar i bandës së Gaxhait, një nga rivalët e Çaushit./abcnews.al
