Rusia tha të enjten se Shtetet e Bashkuara nuk iu përgjigjën shqetësimeve kryesore të Moskës për sigurinë lidhur me krizën për Ukrainën, por shtoi se të dyja palët ishin të interesuara të vazhdonin dialogun.
Kryediplomati rus Sergei Lavrov tha të enjten se përgjigjet e Shteteve të Bashkuara ndaj kërkesave të sigurisë së Moskës jepnin shpresë për fillimin e një dialogu serioz, por vetëm për çështjet dytësore dhe jo për ato themelore.
Presidenti Vladimir Putin do të vendosë për hapat e ardhshëm të Rusisë në lidhje me përgjigjet me shkrim të SHBA-së dhe NATO-s që u dorëzuan të mërkurën, tha zoti Lavrov.
Mes kërkesave të Moskës ishte ajo që NATO-ja të mos vazhdonte zgjerimin duke anëtarësuar vende të tjera në krahun lindor, veçanërisht Ukrainën dhe Gjeorgjinë, si edhe të tërhiqte forcat dhe armatimet nga vendet e Evropës Lindore
Shtetet e Bashkuara i kanë hedhur poshtë këto kërkesa si të panegociueshme, duke kërkuar nga Rusia që të tërheqë forcat e saj nga kufiri me Ukrainën, si edhe i kanë propozuar dialog Moskës për çështje si stërvitjet ushtarake, transparenca, dhe vendosja e raketave.
Ambasadori amerikan në Rusi, John Sullivan, e dorëzoi dokumentin personalisht të mërkurën në Ministrinë e Jashtme të Rusisë. NATO-ja ia paraqiti përgjigjet e veta Rusisë veçmas./VOA
