“Ne i kemi dëshmitarët okularë, të cilët e kanë jetuar genocidin. Komisioni nuk do të hetojë në tokën greke apo në juridiksionin e gjykatave. Nuk shkelet juridiksioni i Republikës së Shqipërisë.”
“Hetimi i genocidit grek ndaj Çamërisë, është kauzë kryesore e PDIU-së ne nuk lëshojmë pe”, tha sot deputetja e PDIU-së Mesila Doda. Ajo sqaroi për mediat atë çfarë ishte vendosur në konferencën e kryetarëve lidhur me kërkesën e PDIU-së për ngritjen e Komisionit Hetimor për krimet ndaj shqiptarëve të Çamërisë.
“Sot është kërkuar që të shtyhet për javën e ardhshme, pasi nuk ka pasur komunikim mes palëve sesi do të trajtohet. Asnjë nuk ka pasur tërheqje do të futet prapë javën tjetër. Besoj që javën tjetër do të kemi lajme të tjera. Kjo është kauza kryesore e PDIU. Nuk do të lëshojmë pe!”, deklaroi ajo.
Pyetjes nëse çështja që do të trajtojë komisioni është apo jo në juridiksionin e parlamentit, Doda tha: “Komisioni që do të hetojë çështjen do të marrë dëshmitarë të ngjarjes, nuk do të hetojë në tokën greke apo në juridiksionin e gjykatave. Do të kërkojmë marrjen e dokumenteve në arkiva. Nuk ka asnjë qëllim të shkelim juridiksionin e Kushtetutës së Shqipërisë.”
Referuar argumenteve kundërshtuese ndaj ngritjes së këtij komisioni që nuk ka kohë, pasi jemi pak muaj para zgjedhjeve, Doda u përgjigj: “Po u kujtoj që këtë e keni thënë edhe në vitet e mëparshme, por janë disa hapa për të marrë një rezultat. Ne nuk kemi faj se çdo dy vjet ka zgjedhje në Shqipëri. Shpërndarja e Kuvendit mund të jetë një problem, por nuk mund të heshtim. Koha është e mjaftueshme. Ne i kemi dëshmitarët okularë, që e kanë jetuar genocidin.”
Në mbledhjen e sotme, konferenca e kryetarëve vendosi që të shtyhet për javën tjetër kërkesa e PDIU-së për ngritjen e një Komisioni Hetimor për Çështjen Çame, pasi kjo nuk ishte diskutuar më parë midis PS-së dhe LSI-së.
