Kryeministri Edi Rama në një komunikim live në rrjetet sociale ka folur rreth lehtësimit të masave në disa aspekte.
Rama foli edhe për debatin që është hapur në lidhje me shtyrjen e pagesave të qerave, ku tha se nuk duhet nxitur konflikti, pasi shqiptarët në momente të vështira kanë treguar se i janë gjetur njëri-tjetrit.
Reagimi i plotë:
“Ne padiskutim që bazuar në këtë ecuri pozitive, mund të mendojmë për të liruar disa masa, për të lehtësuar jetën tonë të përbashkët, por nuk kemi në asnjë mënyrë të drejtë, se kemi detyrimin të mos bëjmë hapa të nxituar. Ndërkohë, kur të nisim të bëjmë disa lehtësime do të bëjmë patjetër edhe disa shtrëngime, për ata që nuk duan të dëgjojnë nuk duan të respektojnë duke kërcënuar të kthehen në bomba. Duke lehtësuar fjala vjen fashën orare apo lëvizjen me automjete për punë, dhe që nuk e kanë humbur, duhet të rrisim fort sanksionet për ata që do ta shkelin hapësirën e kufizimeve në këtë luftë, do të merren edhe masa me heqje lirie fare.
Jemi duke dëgjuar ekspertët dhe punuar me stafin tonë. Më lejoni të jap disa nga ato sqarime që besoj se janë të nevojshme duke ndjekur komentet dhe reagimet. Debati publik ne formën e një sulmi të atyre që fatkeqësisht edhe në mes të luftës nuk pakësojnë dot pllakën e gramafonit të këngës së shëmtuar, si ka mundësi, si mundet shteti të ndërhyjë në një marrëdhënie private. Në një kohë normale ky do të ishte skandal, por është një kohë lufte jo normale, dhe kemi jo vetëm të drejtë, por edhe detyrimin për të mbrojtur këdo që është më në hall, përfshirë natyrisht edhe ata që janë më pak në hall. Ndihmohet një më në hall, më i dobët, një i sëmurë, një i afërm që e ka zënë një hall që nuk e përballon dot, dhe meqë u pa edhe sot se ky do krijonte një konflikt civil, së pari dua të them se historia ka thënë për shqiptarët një gjë të madhe. Shqiptarët janë bukë, kripë dhe zemër, pavarësisht se mes nesh ekziston një specie e veçantë, që është qameti, por nuk e ka penguar popullin shqiptar që në momente të vështira të mos gjendemi. Nuk ma merr mendja se qeramarrësit do kapen për fyti dikë që ka mbyllur biznesin e tij të vogël. Si mund që dikush se është mbyllur brenda dhe mund të kompensojë. Sot janë në shtëpi se nuk shkojnë dot në punë jo se nuk janë në punë. Do ishte mirë që të gjithë ata që kanë një rrugë komunikimi me njerëzit t’u bëjnë thirrje shqiptarëve që kanë dhënë një shtëpi me qera, ta shtyjë këstin”, u shpreh Rama.
