Sot me rastin e Ditës Ndërkombëtare të Bamirësisë, Presidenti Ilir Meta është bërë pjesë e seancës së dhurimit të gjakut, të organizuar nga të rinjtë e “Fundjavë Ndryshe”.
Presidenti Meta ka falenderuar fondacionin bamirës ndërsa shprehet besimplotë se fushata humane e dhurimit të gjakut nuk do të ndalet deri në përmbushjen e qëllimit të saj qytetar dhe fisnik.
Postimi i plotë i Presidentit të Republikës:
“Dita Ndërkombëtare e Bamirësisë dhe Dita e Shenjtërimit të Nënë Terezës, të lidhura fort me njëra-tjetrën në mesazhin njerëzor e të rëndësishëm që përcjellin, humanizmit e solidaritetit ndaj njerëzve në nevojë, më bashkuan me dhjetra të rinj e të reja të “Fundjavë Ndryshe” që me vullnetarizëm organizuan sot një seancë dhurimi gjaku.
Duke e falenderuar këtë Fondacion bamirës, edhe për kontributin e madh të dhënë për lehtësimin sado pak të dhimbjes dhe varfërisë së mijëra qytetarëve, jam besimplotë se kjo fushatë ndërgjegjësimi për kauzën humane të dhurimit të gjakut nuk do të ndalet deri në përmbushjen e qëllimit të saj qytetar dhe fisnik.
Sikurse ka qenë edhe motivacioni në dhënien e Çmimit Nobel për Shën Nënë Terezën, nuk duhet të harrojmë se mjerimi, varfëria dhe vuajtjet janë shpesh një kërcënim për paqen. Vetëm përmes një angazhimi të vazhdueshëm dhe të qëndrueshëm, për të mbyllur këto plagë sociale, ne jo vetëm do dhurojmë shumë dashuri e shpresë, por njëkohësisht do forcojmë paqen dhe begatinë në komunitetet, familjet dhe në Shqipërisë tonë”.
