Jozefina Topalli ka qenë zëri më i fortë i opozitës sot në “betejën” me qeverinë në Kuvend. Në një foto epike të LSA-së ajo shihet tek “kërcënon” me dorë kryeministrin Edi Rama përballë ndërsa i ndante një kordon gardistësh.
Por Topalli është vënë në një dilemë po aq të fortë sot pas deklaratës që ka bërë lideri historik i PD-së dhe një nga shembujt që ajo ka ndjekur në politikë. Sali Berisha tha para Kuvendit për gazetarët se po shikonte mundësinë e dorëzimit të mandatit të deputetit në shenjë proteste ndaj “kriminalizimit të mazhorancës”.
Tashmë Topalli do të duhet të pozicionohet për këtë gjë përkundër asaj që deklaroi vetë për mediat “Opozita ka një detyrë të qëndorjë fort, me çdo kusht, me çdo qëndrim”.
Vendimi zyrtar i Grupit Parlamentar të PD-së është i kundërt me atë që tha Berisha. Grupi ka vendosur të qëndrojë në parlament për të vazhduar betejën e fortë kundër mazhorancës.
Deklarata e Topallit për herë të parë jo në të njëjtën gjatësi vale me atë të shefit të saj politik, Berisha.
“Kjo është një betejë e vështirë dhe jetike. Shqipëria është në udhëkryq. Do ishte më e ndershme, më mirë të qëndronte Armando kryeministër, sepse kjo është fytyra e vërtete e qeverisë. Lufta me krimin është një luftë e vështirë, që kërkon një vendosmëri të madhe dhe sakrifica. Krimi bashkë me mjerimin kthehen në një përbindësh përbindësh për vendin. Jemi në një udhëkeyq për vendin. Opozita ka një detyrë të qëndorjë fort, me çdo kusht, me çdo qëndrim”, tha ajo.
Ndërsa ish-kryetari i PD-së Berisha u shpreh se “Do konsideroj seriozisht qëndrimin tim në këtë strofull krimi. Do të shoh qëndrimin tim ndaj këtij parlamenti që ka në themel hajdutët e shtetit. A jeni dëshmitarë se si Olsi Rama del protagonist në vjedhjen e shtetit në disa afera. Parlamenti ka kaluar afatin e tij. Nuk meriton të ekzistojë asnjë ditë. Unë flas si Sali Berisha, natyrisht grupi i PD merr vendimet e veta”.
Historia e opozitarizmit të ri të PD-së ka nxjerrë shpesh përplasje mes vendimeve të marra në mbledhje me kryetarin e ri, Lulzim Basha, dhe atyre që ka thënë ish-kryetari Berisha, por këtë radhë mbetet për tu parë nëse ai do të pasohet nga idhujtarët e vet në PD nëse merr vendimin për të lënë mandatin e nëse ka një idhujtare të denjë të qëndrimeve të tij politike ajo është Jozefina Topalli./27.al/
