Komuniteti Shqiptar i Selanikut ka njoftuar se nuk merr pjesë në Samitin e IV-të të Diasporës Shqiptare.
Në një njoftim publik, diaspora e Selanikut, thekson se nuk ka më shumë nevojë për samite ceremoniale, sa për përfaqësim të vërtetë, për degjim dhe për zgjidhje reale të problemeve të saj.
‘Shqiptarët në Greqi, si edhe në shumë vende të tjera përballen çdo ditë me sfida të mëdha: dokumentacioni, punësimi, integrimi social, të drejtat, pensionet, arsimi i fëmijëve. Këto nuk zgjidhen me fjalime dhe foto zyrtare, por me politika serioze dhe angazhim të drejtpërdrejtë’, thuhet në njoftim.
Njoftimi
Komuniteti Shqiptar i Selanikut nuk merr pjesë në Samitin e IV-të të Diasporës Shqiptare.
Ne mendojmë se Diaspora shqiptare nuk ka më shumë nevojë për samite ceremoniale, sa për përfaqësim të vërtetë, për degjim dhe për zgjidhje reale të problemeve të saj.
Shqiptarët në Greqi, si edhe në shumë vende të tjera përballen çdo ditë me sfida të mëdha: dokumentacioni, punësimi, integrimi social, të drejtat, pensionet, arsimi i fëmijëve. Këto nuk zgjidhen me fjalime dhe foto zyrtare, por me politika serioze dhe angazhim të drejtpërdrejtë.
Kush është përgjegjës për përjashtimin e zërave që punojnë për Komunitetin dhe në vend të tyre flasin në Samit persona që nuk kanë asnjë lidhje me Diasporën? Më shumë se denigrim, ky është një provokim.
Ne besojmë se diaspora duhet të jetë partnere reale, jo dekor në aktivitete formale.
Respekt për çdo shqiptar që jeton dhe punon me ndershmëri jashtë atdheut.
KËSHILLI DREJTUES i KSHS
Selanik, 13 prill 2026
