Gjykata e Apelit liron nga burgu presidentin e klubit “Kastrioti”, Alban Vogli, i cili u arrestua më 10 maj, si i dyshuar për dhunën e ushtruar ndaj gazetarit sportiv, Eduard Ilnica.
Gjykata e Shkallës së Parë kishte vendosur masën e sigurisë “arrest me burg” për Alban Voglin, por Apeli e ndryshoi masën ndaj tij në “detyrim paraqitje”. Presidenti i klubit të Kastriotit u akuzua për veprën penale të “Plagosjes së rëndë me dashje”, “Goditjes për shkak të detyrës” dhe “Heqjes së paligjshme të lirisë”.
Sipas policisë, shkak për dhunën e ushtruar është bërë një artikull i shkruar nga ana e gazetarit Ilnica.
“Grupi hetimor në vendin e ngjarjes ka bërë të mundur identifikimin dhe më pas kapjen e autorit të kësaj vepre penale, ku u ndalua shtetasi Alban Vogli, 29 vjeç, banues në Krujë, presidenti i ekpit të “Kastriotit”. Ky shtetas ka tentuar të marrë me forcë në mjetin e tij tip “Volkswagen”, me targë AA229LB, shtetasin E. I., ku më pas e ka dhunuar duke e goditur me sende të forta, për arsye të një artikulli që shtetasi E. I. ka publikuar në një gazetë lokale”.
