Ministrja e Arsimit, Lindita Nikolla, ka dënuar rastin e dhunës së ushtruar nga mësuesi 63 vjeçar ndaj nxënësve të shkollës 9-vjeçare në fshatin Ostren. Në një intervistë telefonike për Ora News, ministerja Lindita Nikolla tha se mësuesi është një dhunues i rëndomte dhe duhet të marrë dënimin e merituar.
E pyetur se kush është e vërteta, Nikolla tha se rasti është duke u investiguar. Po ashtu ministerja bëri thirrje që raste të tilla të denoncohen dhe të mos ndodhin më në shkollat shqiptare.
Ju keni qenë në Bulqizë për të parë si është situata në lidhje me ngjarjen në shkollën, si është realiteti?
Lindita Nikolla: Vajza ka bërë kontakt në spitalin e Bulqizës, ka bërë grafi nuk ka pasur nevojë për mjekime të mëtejshme dhe është kthyer pranë familjes së saj, gjë që ma konfirmoi edhe babai me familjarët e tjerë. Kontaktova me drejtorin e shkollës me zyrën arsimore dhe së fundmi edhe me familjarët.
Është një ngjarje e shëmtuar, drejtori i shkollës sapo mori njoftimin shkarkoi mësuesin dhe padyshim organet e drejtësisë kanë operuar për ndalimin e mësuesit dhe procesi i hetimit vazhdon dhe do të dalin konkluzione.
Ne duhet të qëndrojmë fort jo vetëm për të dhënë dënimin e merituar këtij mësuesi por qe edhe histori të tilla mos ndodhin më. Do të jetë një inspektim i vazhdueshëm dhe një detyrim i çdo drejtorie arsimore për të bërë që ngjarje të tilla mos ndodhin në shkollë, të mbahen larg shkollave. Nuk mund të jenë mesues, mësues që shkojnë në shkollë pasi kanë konsumuar alkool apo që shfaqin edhe shenja dhune. Jam e vendosur për ti thënë jo dhunës në shkollë. Falenderoj prindërit e shkollës që e adresuan problemin.Unë sapo u ndava nga takimi me prindërit.
Vendosmëri për të kthyer autoritetin e shkollës dhe për të kthyer autoritetin e mësuesit dhe që sigurisht nuk është ky, një mesues që dhunon. Ky është një dhunues i rëndomte, pavarësisht se është 63 vjeç dhe ka mbi 20 vite në arsim. Ai të marrë dënimin që meriton.
Mësuesi ka mbi 20 vjet në arsim, si ka arritur kjo çështje deri këtu?
Lindita Nikolla: Prindërit thanë se kanë pasur ankesa të këtij viti, procesi i verifikimit vijon. Prindërit më thanë që ky vit ka qenë më i rënduar, i cili vinte me vonesë apo situata me alkoolin, por do ta investigojmë kush janë arsyet. Është e vërtetë që është një familje e nderuar, bashkëshortja e mësuesit (mësues në thonjëza sepse sot ai nuk përfaqëson figurën e mësuesit) është një mesuese ku komunitetit ka respekt të madh. Por faktet janë fakte, ajo që ka ndodhur është e papranueshme dhe ne jemi këtu për ta ndaluar. Kjo situatë duhet të largohet nga shkollat e Shqipërisë edhe në fshatrat më të largëta.
Jam i saktë kur them se do të ketë një procedim penal?
Lindita Nikolla: Personi është ndaluar dhe organet e drejtësisë do të zbatojnë ligjin dhe do të marrin masat. Mos hezitojnë dhe të denoncojnë çdo akt dhune.
