Presidenti Bujar Nishani ka deklaruar se ka ndjekur me shqetësim dhunën e ushtruar mbrëmë në Parlamentin e Maqedonisë.
Përmes një deklarate, Nishani shpreh keqardhjen për daljen nga kontrolli të situatës dhe dënon dhunën e ushtruar ndaj deputetëve të Maqedonisë, veçanërisht të atyre me origjinë shqiptare.
Nishani ka bërë thirrje për qetësimin e situatës dhe kapërcimin e saj me maturi politike.
Presidenti Nishani përshëndet zgjedhjen e zotit Talat Xhaferri në postin e Kryetarit të Parlamentit dhe e konsideron këtë akt si një zhvillim shumë pozitiv për marrëdhëniet ndëretnike në Maqedoni që duhet mbështetur gjerësisht.
“Zbatimi i plotë dhe i shpejtë i Marrëveshjes së Ohrit, në të gjitha elementët e saj, do të ishte garancia më e mirë për harmoninë dhe bashkëjetesën ndëretnike në Maqedoni”, tha Nishani.
