Ministrja e Arsimit Evis Kushi ka deklaruar ditën e sotme se qeveria do të nisë një vlerësim psiko-social për çdo mësues në vendin tonë. Kushi bëri me dije se do të ndërmerret një fushatë ndërgjegjësimi për ndalimin e dhunës në shkollë dhe trajtimin e çdo rasti specifik me në fokus nxitjen e nxënësve, prindërve, mësuesve dhe gjithë komunitetit shkollor për të denoncuar dhunën apo abuzimin. Sakaq, ajo kërkim që institucionet arsimor të respektojnë me përpikmëri ligjin në raste ku evidentohet dhunë apo abuzime nga mësuesit ndaj nxënësve.
“Pas një takimi me drejtuesit e njësive të shërbimit psiko-social nga të gjitha zyrat vendore arsimore, si dhe konsultimeve me ekspertë e Ministrisë së Arsimit angazhohemi që: së shpejti të bëhet një vlerësim psiko-social fillestar dhe periodik për çdo mësues në sistemin arsimor; të ndërmarrim një fushatë të re ndërgjegjësimi “Stop Dhunës në Shkollë” për parandalimin dhe trajtimin e çdo rasti, me fokus nxitjen e nxënësve, prindërve, mësuesve dhe gjithë komunitetit shkollor për të denoncuar dhunën apo abuzimin. të respektohen me përpikmëri të gjitha aktet ligjore, nënligjore dhe rregulloret në shkolla ku parashikohet largim nga detyra për çdo rast dhune apo abuzimi nga punonjësit arsimor”, shprehet ajo.
Kujtojmë se ky reagim vjen pas një rasti të rëndë që ndodhi në Fier, ku drejtoresha përjashtoi nga shkolla një nxënës me aftësi të kufizuara. Pas denoncimit në media, ministria shkarkoi menjëherë drejtoreshën.
