Dhoma Kombëtare e Përmbaruesve Gjyqësorë Privatë, ironizon Etilda Gjonajn pas një shkrimi të djeshëm të saj ku shkruante për sfidat e 4 viteve në krye të Ministrisë së Drjetësisë. Sipas përmbaruesve, në 4 vite ajo nuk i ka mbledhur ata as 1 orë të vetme.
“Sfidat, piedestalet dhe motivet e ndezura për Drejtësi do ta ndjekin kudo “Bareshën e Reformës”, bashkë me një pyetje që do të mundojë edhe ca, gjithë përmbaruesit, noterët, avokatët e ndërmjetësit kudo në Shqipëri: Në këto katër vjet suksese, arritje e privilegje fantastike, si nuk bashkëndau 1 herë të vetme, 1 mbledhje të vetme, 1 orë të vetme bashkë me të gjithë ne, disa motive të poemës që aq bukur e recitoi deri në fund, “Reforma në Drejtësi”?!”, shkruan Dhoma e Përmbaruesve.
Shkrimi i Dhomës së Përmbaruesve:
“BAGËTI E BUJQËSI – “RROFTË REFORMA NË DREJTËSI”
Mos ngatërrohet askush: “Bagëti e Bujqësi” është poema fantastike e Naim Frashërit, kryevepra që shqiptarët kanë mbi 100 vjet që e recitojnë dhe njohin përmendësh shumicën e saj. Naimi i përmalluar pas fshatit ku ishte lindur e rritur, përshkruan me detaje, idilizëm dhe eufori çdo element të peizazhit të Shqipërisë: malet, lisat e gjatë, fushat, kodrat dhe pyjet e gjelbëruar…!
Pas 135 vjetësh, me një patetizëm monumental, një ministreshë përcjell veten nga pragu i ministrisë që e përshkruan me shumë dashuri, krenari dhe mall (që e kapi për shpirti ende pa u larguar prej godinës) bashkë me punën dhe përkushtimin e saj. Lexoni me pak durim mbi link-un:
https://m.facebook.com/story.php?story_fbid=1050258482396159&id=159898654765484
“Drejtësia”, “Reforma në Drejtësi” dhe “Bis 41” janë motivi frymëzues i saj, që ashtu si Naimi, të dy bashkë, synojnë të ngjallin ndërgjegjen tonë kombëtare.
Poeti Naim, i mrekulluar nga natyra shqiptare, idealizoi jetën në atdhe, ndërsa “poetesha” e cila mbushi plot 4 vjet në ministrinë që e himnizoi me ngjyrat më të bukura, idealizon Drejtësinë dhe Reformën që na oksigjenon të gjithëve.
Sfidat, piedestalet dhe motivet e ndezura për Drejtësi do ta ndjekin kudo “Bareshën e Reformës”, bashkë me një pyetje që do të mundojë edhe ca, gjithë përmbaruesit, noterët, avokatët e ndërmjetësit kudo në Shqipëri: Në këto katër vjet suksese, arritje e privilegje fantastike, si nuk bashkëndau 1 herë të vetme, 1 mbledhje të vetme, 1 orë të vetme bashkë me të gjithë ne, disa motive të poemës që aq bukur e recitoi deri në fund, “Reforma në Drejtësi”?!
Mund të këndonte edhe “Bagëti e Bujqësi”, nuk do të ankohej askush mjafton që një herë të vetme ta shihnim të gjithë së bashku, ministren tonë të Drejtësisë, në një takim, bisedim ose puqtim me motive pune – pastë qoftë ky edhe në platformën “Zoom” galá.
P.s: Një lutje për zyrën e shtypit pranë KM: Të mos lihen talentet e Reformës që pasi mbarojnë misionin e tyre fisnik, të shkruajnë vetë dedikimet e lamtumirës. Emocionet e forta mund të cedojnë veprën e tyre. Ka arsye që Naimi nuk e recitoi kurrë vetë kryeveprën e tij, “Bagëti e Bujqësi”.
