Rreth 90 për qind e treguesve të matur me rënie
Probleme me taksat, monopolet, konkurrencën e pandershme dhe administratën. Ky është perceptimi i sipërmarrësve amerikanë për klimën e biznesit në Shqipëri. Treguesi i Indeksit të Besimit të Dhomës Amerikane për vitin 2015 ka shënuar një rënie me 4.83 pikë përqindjeje, duke zbritur nga 42.77 në 37.94 pikë. Kjo është hera e parë që ky indeks shënon rënie, që nga 2012-a, që është viti i parë kur u mat ky indeks. Për 2016-n pritet një përmirësim i lehtë në 40.61, por që mbetet gjithsesi nën nivelin e vitit 2014, kur ky tregues ka regjistruar nivelin më të lartë. Indeksi mat elementët e rëndësishëm të tilla si politikat e qeverisë, nivelin e taksave, korrupsionin, informalitetin, zbatimin e ligjit dhe gjithashtu elementë lidhur me performancën e bizneseve dhe ekonomisë shqiptare. Më shumë se 65% e anëtarëve të Dhomës Amerikane e kanë perceptuar klimën e biznesit në Shqipëri si të pafavorshme, ose shumë të pafavorshme, 5.2% e kanë konsideruar klimën si pozitive dhe 29.1% si neutral. Tre shqetësimet kryesore të raportuar nga të anketuarit për vitin 2015 ishin “niveli i përgjithshëm i taksave të zbatuara” (26.89), “Monopoli dhe konkurrenca e pandershme” (27.8), “Burokracia e qeverisë” (28.17). Rënie të thellë ka patur edhe matja e treguesit të marrëdhënies së biznesit me administratën tatimore e doganore.
Në mesazhin përcjellës të botimit të këtij indeksi ambasadori amerikan Donald Lu shpreh zhgënjimin e tij dhe nxit qeverinë e autoritetet që ta përdorin raportin si një nxitje për të përmirësuar klimën e biznesit dhe miratuar reformat.
