Në shkurt 20 për qind e totalit të kredisë klasifikohet e keqe
Megjithë ndërhyrjet e Bankës së Shqipërisë treguesi i kredive të këqija është në rritje. Sipas shoqatës së Bankave në tre muaj dhjetor 2015 shkurt 2016 kredia e keqe është rritur edhe me 4.2 miliard lekë, duke shkuar në total në 110.8 miliardë lekë. Sipas shifrave të publikuara nga Shoqata e Bankave kreditë e këqija pësuan një rritje të re gjatë muajit shkurt 2016, duke shkuar në 18.9 për qind të totalit të portofolit të kredive në fund të muajit. Në dhjetor treguesi ishte 18.2 për qind.
Në vlerë totali i kredive të këqija është rritur nga 106.6 miliardë lekë që ishte në dhjetor, në 110.8 miliardë lekë në shkurt, pra me një rritje prej 4.2 miliard lekë. Vetëm gjatë muajit shkurt, portofoli i kredisë totale të dhënë nga bankat për ekonominë u rrit me 1.1 miliardë lekë ndërsa kredia e keqe, e cila përfshin kredinë që ka shënuar vonesa të gjata në shlyerjen e kësteve, u rrit me 3.1 miliardë lekë. Kreditë e këqija konsiderohen si problemi kryesor pengues në rigjallërimin e rritjes ekonomike të vendit. Kreditë e këqija në një masë të madhe kontrollohen nga një numër i vogël biznesesh. 35 kompani të mëdha mbajnë 65 për qind të kredisë së keqe me vlerë rreth 600 milionë euro.
