Deputeti socialist Taulant Balla dhe dhëndëri i ish-kryeministrit Berisha, Jamarbër Malltezi janë konfliktuar mbrëmë në Romë, sipas një denoncimi të bërë në policisi nga deputeti Taluant Balla në Rinas.
Sipas informacioneve të dy personazhet e përfshirë në sherr janë tentuar të merren në pyetje, por vetëm Balla ka pranuar, ndërsa Malltezi është larguar duke thënë se këto janë sulme politike.
Jamarbër Malltezi ka qëne i shoqëruar nga bashkëshortja e tij Argita. Kjo e fundit ka nisur një sherr verbal me Ballën e më pas Jamarbër Malltesi e ka qëlluar deputetin socialist. Kjo sipas burimeve nga policia që i referohen denoncimit të Taulant Ballës.
Sipas burimeve në polici ngjarja ka ndodhur në aeroportin “Leonardo da Vinçi” të Romës dhe me të mbërritur në Tiranë deputeti socialist ka bërë denoncimin për këtë ngjarje. Çështja tashmë i ka kaluar prokurorisë me akuzën “goditje për shkak të detyrës”.
Sipas Ballës, në denoncimin e bërë prej tij, Malltezi e ka fyer dhe më pas goditur deputetin socialist. Në orët e para të ditës së sotme materialet i kanë kaluar prokurorisë.
Gjatë ditës priten reagime në lidhje me këtë ngjarje për të zbardhur plotësisht atë që ka ndodhur. Nuk është hera e parë që Taulant Balla dhe Jamarbër Malltezi shkëmbejnë akuza te forta me njëri-tjetrin.
