Ministria e ekonomisë përgjigje kompanive: mungesa të shumta në dokumentacion
Dështoi tenderi për zonën e lirë të Spitallës në një sipërfaqe prej 500 hektarësh për 99 vjet. Ministria e Zhvillimit Ekonomik, Turizmit, Tregtisë dhe Sipërmarrjes skualifikoi, kompaninë kineze dhe atë italiane pjesëmarrëse në konkurim. Në përgjigjen e dërguar Përfaqësuesit të konsorciumit kinez të shoqërive “Zhejiang Haiteng Investment” dhe “Bejing Dongrun Technology, njoftohen se oferta e tyre është skualifikuar për shkak të mangësive të shumta në dokumentet teknike si edhe për paraqitje dokumentash të panoterizuara.
Ndërkohë në letrën e drejtuar kompanisë “RENDur” 4 sh.p.k, Ministria e Zhvillimit Ekonomik, Turizmit, Tregtisë dhe Sipërmarrjes e njofton atë se nuk ka mos plotësuar asnjë nga pikat si kusht për kualifikim.
Tenderi ndërkombëtar për zhvillimin e zonës teknologjike të Spitallës në qarkun e Durrësit u hap në qershor të vitit të kaluar. Përmes tij, qeveria shpresonte të tërhiqte mbi 1 miliardë euro investime.
Në fund të tetorit, vetëm dy kompani dorëzuan oferta. E para ishte konsorciumi i përkohshëm i kompanive kineze oferta e të cilëve parashikon një vlerë investimi në shumën e 1.5 miliardë dollarë për 9 vite dhe synonte hapjen e 90 mijë vendeve pune. E dyta ishte kompania italiane “RENDur4”, që nuk prezantoi një ofertë financiare.
