Ish-kryetari i PD-së, Sali Berisha dhe pasardhësi i tij Lulzim Basha janë përkulur sot në nderim të atyre që ranë në luftën Nacional-Çlirimtare. Data 5 maj, që është dita e vrasjes së Qemal Stafës, shënon dhe ditën e dëshmorëve të atdheut. Edhe pse ka shumë rezerva për luftën dhe ata që e udhëhoqën me në krye diktatorin komunist Enver Hoxha, opozita e djathtë ka qenë e para sot që ka shkuar tek varrezat e Dëshmorëve për të bërë nderimet e rastit tek memoriali Nënë Shqipëri.
Kreu i PDsë, Lulzim Basha, në mesazhin e tij për mediat e ka zgjeruar gamën e nderimit duke përfshirë dhe dëshmorët që luftuan për çlirimin e Kosovës.
“Sot kujtojmë sakrificën më të lartë për atdheun dhe kombin, flijimin e dëshmorëve të kombit në luftërat që shqiptarët kanë zhvilluar për lirinë e Shqipërisë, lirinë e Kosovës, të drejtat e tyre në Maqedoni e Luginën e Preshevës. Nderojmë heronjtë, bijtë dhe bijat e këtij kombi. Përulemi me nderim të thellë para atyre që dhanë jetën për vlera të shenjta, për lirinë nga krimi nga terrorizmi. Përulemi para bijve dhe bijave që dhanë jetën nën uniformën e forcave të armatosura. E sotmja është edhe një ditë reflektimi, reflektimi i PD para gjakut të dëshmitarët është beteja jonë deri në fitore për një Shqipëri të lirë, të çliruar nga krimi dhe korrupsioni. Lavdi përjetë dëshmorëve të kombit”, deklaroi Basha.
Pritet që sot paradite, Varrezat e Dëshmorëve të vizitohen nga kreu i qeverisë Edi Rama i shoqëruar nga kreu i Kuvendit, Ilir Meta.
