Në faqen zyrtare të Eurovisionit në Facebook para se të shpalleshin finalistët u publikuan fragmente nga performancat e secilit prej pjesëmarrësve. Me mijëra pëlqime dhe qindra komente pati tek një nga këngët më të vlerësuara që ishte ajo e Eugent Bushpepës.
Por ndërsa komentuesit më të shpeshtë ishin shqiptarë, pati edhe jo pak të huaj që përgëzonin Bushpepën. Dhe sapo shqiptarët pikasnin një të huaj që shprehte pëlqim ndaj këngës sonë, i luteshin me komente që ta votonin Eugentin.
Thuajse pas çdo komenti të të huajve kishte shqiptarë që kërkonin me ngulm që “Mall” të kalonte në finale.
“Ai përfundimisht e meriton të jetë në finale. Urime nga fqinji juaj Greqia”, shkruante një komentuese greke, ndërsa shqiptarët vijonin “të mblidhnin vota”.
Nuk mund të përcaktohet se sa ka ndikuar “fushata virtuale” e shqiptarëve që “Mall” të kalonte në finale, ama muzika pati forcën që t’i bashkojë krejt natyralisht, pa asnjë bashkëpunim të paralajmëruar.
