Një maturante nga qyteti i Librazhdit ka denoncuar faktin që drejtoresha e gjimnazit ku ajo ka kryer studimet, merr para për çdo maturant që merr certifikaten e notave dhe diplomën e maturës.
Sipas vajzes, e cila dëshiron të mbetet anonim, por ne po publikojmë edhe mesazhin e saj, pa emër, thotë se është zonja Klarita Lumani e cila këtë vit, edhe vitin e kaluar u ka kërkuar të gjithe maturantëve të paguanin 500 lekë të reja, 5 mijë të vjetra për të marrë këto dy dokumenta, certifikatë notash dhe diplomë mature.
Denoncimi i vajzës
Përshendetje! Doja të bëja një ankesë për një problem vërtet shqetësues që ka ndodhur në shkollën time. Unë sapo përfundova vitin e 3të gjimnazit.
Ditën e shtunë në datë 22/07 ne maturantët u paraqitëm në shkollë për të marrë certifikatën e notave të gjimnazit. Po ashtu dhe diplomën. Arsyeja që unë po ju shkruaj është se ndodhi diçka e çuditshme dhe e papranueshme. Drejtoresha e shkollës sonë, pra e gjimnazit Ibrahim Muça zonja Klarita Lumani na kërkoi të gjithë ne maturantëve të paguanim 500 lekë të reja, pra 5 mijë të vjetra për të marrë këto dy dokumenta, çertifikatë notash +Diplome Mature.
Në asnjë gjimnaz tjetër nuk paguhen para për këtë gjë sepse këto dokumenta vijnë nga Ministria e Arsimit dhe me pas në Zyrat Arsimore të cilat i shpërndajnë në shkolla.
E njëjta drejtoreshë ka bërë të njëjtin veprim, pra marrje parash edhe para dy vitesh edhe këtë vit.
Para për të cilat ne nuk marrim asnjë mandat dhe jepen drejtperdrejt kesh në dorën e drejtoreshës, e cila nuk na jep asnjë shpjegim se pse po i paguajmë.
Kjo është një nëpërkëmbje dhe shkelje e të drejtave tona si nxënës të arsimit publik i cili presupozohet se është falas.
Do iu lutesha ta publikoni si rast, të pakten vitet pasardhëse të mos bëjnë pagesa të pajustifikuara si ne. Ju faleminderit!
/Panorama/
