Nga Afrim Krasniqi
Sot është Dita Ndërkombëtare e Demokracisë. Mediat dhe burimet serioze Perendimore që merren me demokracinë dhe problematikat e saj e kanë pjesë të axhendës ditore. Në Shqipëri pak njerëz e dinë simbolikën e Ditës së Demokracisë dhe me siguri nuk do të ketë asnje aktivitet. Ne kemi gjëra të tjera për tu preokupuar si psh: çfarë i tha Rama i vogël Ramës së madh, çfarë i tha Luli Mulit, çfarë i tha Vasili Saimirit, çfare i tha Noisy Cozman….pra kemi halle të tjera, axhendë tjetër dhe prioritete të tjera. Kurse DEMOKRACIA që premtuam dhe prodhuam pas 25 vitesh i ngjan një fotokopje të falsifikuar, pa arritur të prodhojë asnjë nga ato që prisnim: shtetin e së drejtës, përfaqësimin cilësor, integritetin, vlerat, besimin dhe moralitetin. Vendin e Byrose Politike e kanë zënë oligarkët që komandojnë shefat e sëmurë pas lavdisë e pushtetit personal, partia ka monopol mbi gjithçka përfshirë pronën, përfaqësimin dhe karrierën; Shqipëria Politike i ngjan modelit të atyre që blinin diploma në autostradë, – e dhënë pas luksit e fitimit dhe arrogante ndaj dijes dhe vlerave!
Ku votohet sot? Në zgjedhje parlamentare e lokale? Në sindikata e shoqëri civile? Në federata e universitete? Në shkolla e komunitet? Në parti politike? As mos tju shkojë ndërmend. Nëse kërkon votim je armik, nëse kërkon konkurrencë je njëherësh armik dhe i shitur. Fatkeqësisht vota e ka humbur vlerën dhe demokracia që buron prej saj është kthyer në oligarki e atyre që vjedhin votën për të vjedhur më pas gjithçka që buron nga produkti i saj.
Dita e demokracisë? Shikoni fotot si e nisëm dhe sa shumë besonim. Shikoni si jemi sot: përjetësisht të fundit. Ne nuk jemi zhgënjyer nga demokracia sepse nuk e kemi përjetuar atë, por jemi të zhgenjyer nga kjo gjëja pa formë që quajmë demokraci. Fale Zotit kemi SHBA e BE këtu që të ndodhin ca gjëra pozitive ndryshe do kishim mbetur peng i drekave dhe humorit të Gjirit te Lalzit ku çdoherë njëri nga ata në tavolinë ka bërë shkollën e burgut, – kriter përcaktues për elitat që me rotacion vijnë me premtimin për të na shërbyer dhe me pas na duan të gjithëve shërbëtorë pa zë, pa fjalë, pa emra, por me flamurin e partisë dhe foton e liderit në dorë.
