Kryeministri Edi Rama, i shoqëruar nga ministri i Shtetit për Rindërtimit, Arben Ahmetaj, ka inspektuar punimet në një prej kantiereve të ndërtimit të një shkolle në Sukth, e cila ishte mes godinave të dëmtuara nga tërmeti i 26 nëntorit. Ai theksoi se të gjitha shkollat e dëmtuara, janë në kantier.
Po ashtu Rama tha se këto shkolla do i hapin dyert në 26 nëntor.
“Tanimë shkollat e reja të financuara nga buxheti i shtetit janë në kantier dhe kudo ku tërmeti i 26 nëntorit goditi arsimin, duke shkatërruar shkollat e vjetra, po ngremë një infrastrukturë moderne, me standardet më të larta të sigurisë e me kushte optimale për nxënësit e mësuesit. Një pjesë e konsiderueshme e shkollave të reja do të hapin dyert në 26 nëntor dhe në përfundim të kësaj Rilindjeje shembullore nga gërmadhat e 26 nëntorit tragjik të vitit të shkuar, do të kemi 140 shkolla e kopshte të reja, më të forta, më të mira, e natyrisht më të bukura se ato që humbëm në fatkeqësinë e vitit të shkuar”, tha ai.
Ministri Ahmetaj, në prani të Ramës, ndau me publikun dhe një lajm të mirë duke shtuar se brenda kësaj jave hapet faza e dytë për tenderimin e njësive individuale. “65 mln euro po shkojnë për shkolla. Dy lajme të mira, edhe Fondi Shqiptar i zhvillimit dhe bashkia e Tiranës, hapin fazën e dytë të tenderimit të njësive individuale. Pra nëse shkon mirë, për 7-8 ditë do të jetë gati kontrata individuale”, tha ai.
