Organi i akuzës po heton për rreth 570 zyrtarë të lartë të administratës publike, por edhe deputetë e drejtues vendorë
Janë 15 zyrtarë të lartë të administratës publike, për të cilët Prokuroria e Përgjithshme ka kërkuar shenjat e gishtave për t’i hetuar, pasi ata kanë ndryshuar identitetin. Hetimi bëhet në kuadër të ligjit të dekriminalizimit. Organi i akuzës konfirmon se për një pjesë të subjekteve, përgjigjet kanë mbërritur dhe ndaj tyre është vepruar, kurse për pjesën tjetër hetuesit janë ende në pritje të përfundimeve.
Sektori i dekriminalizimit në Prokurorinë e Përgjithshme ka në verifikim 570 zyrtarë, nga të cilët 20 janë të nivelit të lartë, si deputetë apo të zgjedhur vendorë. Pjesa dërrmuese janë përcjellë nga Departamenti i Administratës Publike duke qenë se kanë edhe numrin më të madh të subjekteve që vetëdeklarojnë në kuadër të ligjit për dekriminalizimin.
Ndërsa pjesa tjetër ka ardhur nga institucione si KQZ, Presidenca, Kuvendi dhe Këshilli i Ministrave. Mësohet se deri tani është marrë vendim për 170 raste, ndërsa të tjerat janë ende në fazë verifikimi, për rreth 40 raste është vendosur ndjekja penale pranë prokurorive të rretheve gjyqësore për veprën penale të “falsifikimit të formularëve”.
Vendimmarje është marrë për 50 raste, ku u është ndaluar kryerja e funksioneve publike.
