Inflacioni i muajit prill 0.3 për qind
Ekonomia është në deflacion. Sipas të dhënave zyrtare të INSTAT prilli është muaji i katërt me radhë me një rritje krejt të pandjeshme të çmimeve, ç’ka konfirmon rënie të theksuar të kërkesës konsumatore. Me inflacion 0.3 për qind duket se vendi është përballë vështirësive serioze të ekonomisë. Me këtë shifër inflacioni duket se edhe ndërhyrjet e Bankës së Shqipërisë, që i ka çuar normat e interesit në rekorde historike dhe shumë pranë zeros, nuk po japin asnjë ndikim në situatën pesimiste të rënies konstante disamujore të konsumit dhe të çmimeve.
Në detajimet që sjell matja e kryer nga INSTAT rezulton se rënien më të madhe e kanë çmimet e shërbimeve të transportit, shëndetit, veshjeve dhe këpucëve. Kështu çmimet e grupit “Transporti” kanë rënë mesatarisht me 0,33 pikë përqindje, ata të grupit “Veshje dhe këpucë” kanë rënë 0,09 pikë përqindje, të grupit “Komunikim” kanë rënë -0,03 pikë përqindje dhe çmimet e grupit “Shëndeti” kanë rënë me -0,01 pikë përqindje. Me ulje kanë rezultuar të jenë edhe çmimet e bukës, drithërave, qumështi, djathi e vezët, perimet, ushqimet dhe pijet alkolike.
Ndërkohë me rritjen më të lartë kanë qenë çmimet e frutave, të cilat tashmë nuk e kanë sezonin si edhe çmimi i shërbimeve arsimore.
