Një televizor bardh e zi, ku familja Kraja sheh çdo javë Parlamentin dhe politikanët se si ndryshojnë ligjet, si për ironi të fatit është kjo politikë që i hoqi atij dhe bashkëshortes bukën e gojës. Nuk ka marrë pikët e mjaftueshme në skemë sepse ka një televizor që familjes ia kanë dhuruar.
Nga viti 1994 kjo familje ishte pjesë e skemës së ndihmës ekonomike, pasi ajo ndihmë është e vetmja e ardhur që kanë.
Në këto ditë të ftohta kur çdo familje struket rreth zjarrit, Myzaferi dhe bashkëshortja e tij nuk kanë cfarë të hanë, e aq më tepër cdo gjë që bie jashtë depërton brenda. Përvec kësaj kryefamiljarit i shtohet barra e sëmundjes së bashkëshortes.
Të ndodhur përballë kësaj skamje, ku dora e shtetit nuk ofron asgjë, bashkëshortja apelon drejt bizneseve, apo çdokujt që mund të ofrojë diçka në këtë mot të acartë.
Kjo është vetëm një ndër qindra familje që skema e re e ndihmës ekonomike i ka lënë jashtë për arsye aspak të kuptueshme, thjesht nuk plotësojnë pikët.
