Para disa ditësh banorët e komunitetit rom dhe egjiptian të Bregut të Lumit u informuan verbalisht nga punonjës të shërbimit social, si dhe të Njësisë Bashkiake që vendbanimet e tyre do të prishen brenda disa ditëve.
Më pas, në terren kanë ardhur përfaqësues nga Drejtoria e Shërbimit Social që i kanë dhënë banorëve një ofertë për bonusin e strehimit, duke mos i ofruar një bashkëbisedim mes komunitetit dhe institucioneve. Kështu, banorëve u është hequr e drejta të japin një ide për zgjidhjen e situatës sipas mënyrës së tyre.
Oferta e Bashkisë parashikon 1 vit qira të paguar nga Bashkia në masën 80% , dhe banorët duhet të dalin vetë në tregun e lirë për të kërkuar banesat e tyre. Sipas banorëve dhe aktivistëve të cilët kanë rreth 4 muaj që merren me këtë çështje, kjo ofertë ka 2 probleme kryesore: Duhet një kontrate qiraje për të vërtetuar pagesën nga ana e Bashkisë, dhe banorëve u duhet një vend për të mbledhur mbetjet e riciklueshme, që të sigurojnë jetesën.
Banorët e kanë kundërshtuar këtë ofertë verbalisht dhe kanë bërë një kërkesë për një takim me kryetarin e Bashkisë për të negociuar midis palëve. Këta banorë kanë rënë dakord midis tyre për të kërkuar një pjesë toke që është nën mbikqyrjen e Bashkisë dhe që plotëson nevojat e komunitetit. Në daljen e aktivistëve në terren, u përballen sërish me punonjësit e Bashkisë, pasi këta të fundit kishin shkuar nëpër shtëpitë e banorëve për të biseduar në mënyrë private dhe i kishin kërkuar banorëve që të pranojnë bonusin e strehimit. Ndërsa në një familje tjetër, sipas aktivistëve, punonjësit e Bashkisë i kishin kërkuar të firmosnin një deklaratë për të përfituar kredi të lehtësuar, por kredia është pezulluar prej kohësh për këtë familjë për shkak të paaftësisë paguese.
Gjithashtu, aktivistët i kanë dërguar një kërkesë Bashkisë për hartën dhe planin e punimeve që do të bëhen, për të ditur se cilat familje do të preken konkretisht nga këto punime, por akoma nuk kanë marrë një përgjigje për kërkesat e tyre.
Në zonën e Bregut të Lumit janë plot 72 familje të cilat duhet të gjejnë një zgjidhje shumë shpejt për këtë situatë, përndryshe do mbeten në mes të rrugës sepse punimet për reabilitimin e Lumit dhe ndërtimin e Unazës së Re janë vendosur që do të vazhdojnë.
Ndërkohë, dhe Institucioni i Avokatit të Popullit ka shprehur shqetësimin për këtë çështje në një deklaratë për shtyp ditën e sotme.
Gjonaj: “Kërkesat bazë e komunitetit qëndron në bërjen transparente të ndërhyrjeve dhe vendimmarrjeve nga ana e Bashkisë së Tiranës që prekin dhe cenon jetën e këtij komuniteti dhe ofrimin e alternativave për strehim, si dhe diskutimet e tyre me komunitetin nga ana e kësaj bashkie në rast të prishjes së banesave të tyre për shkak të zbatimit të veprave publike. Tepër shqetësues për këtë komunitet, paraqitet edhe problemi i prezantuar i arsimimit të fëmijëve të tyre dhe përkeqësimi në rast zhvendosjeje.
Institucioni i Avokatit të Popullit i Bashkohet këtij shqetësimi që paraqet vet komuniteti dhe ndan shqetësimin se çdo praktikë e ndjekur në kundërshtim me mbrojtjen dhe respektimin e të drejtave të njeriut, cenon rëndë jetesën e këtij komuniteti duke e përkeqësuar edhe më shumë atë.”
