Trajneri i Kombëtares shqiptare, Gianni De Biasi ka deklaruar se do të largohet nga Kombëtarja shqiptare në fund të kualifikimeve të botërorit.
Lajmin e bëri të ditur në një konferencë për shtyp pas përfundimit të grumbullimit për ndeshjet me Luksemburgun dhe Izraelin.
“Në fund të kualifikueseve do të largohem. Çdo fillim e ka edhe një fund. Kam një kontratë të cilën po e respektoj. Pas Izraelit shumë donin të bënin gati funeralin tim”- është shprehur De Biazi.
Për sa i përket të ardhmes dhe rinovimit të kontratës me Shqipërinë, trajneri italian i Kombëtares tha se nëse Federata dëshironte ta mbante, do ta bënte më parë, jo sot dhe se tani është vonë.
“Ka disa situata në jetë në të cilat dikush duhet të ndjejë rrotull besimin dhe konsideratën, të cilën pavarësisht 5 viteve e gjysmë, mendoj se ende nuk e kam nga dikush. Mendoj se nëse Federata dëshironte Gianni De Biasi-n, do ta bënte më parë, jo sot, se tani është vonë. Por unë prisja diçka ndryshe, nuk funksionon kështu. Ata që janë më të mirë, janë konfirmuar 4 vite më parë, unë nuk prisja të më konfirmonin dy vite para, por prisja një diskutim ndryshe nga federata”- tha De Biasi.
