Zëvëndësambasadori amerikan i bën thirrje politikës të punojë për këtë reformë për të bërë një Shqipëri më të mirë
Nuk mjafton vetëm miratimi i reformës në Drejtësi, duhet edhe zbatimi rigoroz i saj për të bërë ndërkombëtarët të besojnë se drejtësia në Shqipëri po reformohet. Zëvëndësambasadori amerikan në Tiranë tha se është me shumë rëndësi zbatimi i reformës në Drejtësi dhe jo vetëm miratimi i saj. “Kjo nënkupton që të gjithë ju keni përgjegjësinë që të siguroheni që reforma në drejtësi jo vetëm të miratohet në Kuvend, por që të zbatohet siç duhet – për t’u siguruar që gjykatësit dhe prokurorët t’u përmbahen të njëjtave rregulla si ju dhe unë, dhe që sistemi t’i trajtojë të gjithë me drejtësi, pavarësisht përkatësisë politike, lidhjeve familjare ose origjinës.Vazhdoni të luftoni për reformën dhe vazhdoni të jeni udhëheqës në komunitetet tuaja. Jam besimplotë se vite nga sot, kur të kthejmë kokën pas, do të na duhet t’ju falenderojmë që keni krijuar një Shqipëri më të mirë”, tha zvambasadori amerikan.
Deklarata e diplomatit amerikan u bë sot në një aktivitet të organizuar nga Ministria e Drejtësisë, në ditën ndërkombëtare të Drejtësisë.
