Sekretari i Departamentit Amerikan të Shtetit, Antony Blinken ka emëruar Jim O’Brien si koordinatorin e ri të Sanksioneve në DASH. Jim O’Brien, do të jetë përgjegjës për të njoftuar dhe ndjekur nga afër të gjithë procesin për bllokimin e pasurive dhe pezullimin e hyrjes në Shtetet e Bashkuara të personave që kontribuojnë në destabilizimin e Ballkanit Perëndimor, përfshin tashmë edhe Shqipërinë.
Sipas një njoftimi në rrjetet e tij sociale, sekretari i Departamentit Amerikan të Shtetit, Antony Blinken bën me dije se O’Brien do të luajë një rol vendimtar në formësimin e politikës së sanksioneve kundër korrupsionit.
“Ne e mirëpresim ambasadorin Jim O’Brien si @StateDept Koordinatori i ri i Sanksioneve. Jim do të luajë një rol vendimtar në formësimin e politikës sonë të sanksioneve për të promovuar përgjegjësinë për korrupsionin dhe abuzimin e të drejtave të njeriut dhe për të penguar aktivitetet që kërcënojnë sigurinë tonë kombëtare,”-shkruan Blinken ndër të tjera.
Ndërsa postimi i tij është ripostuar edhe nga ambasadorja amerikane në Shqipëri, Yuri Kim. Kjo e fundit nuk ka dhënë asnjë koment lidhur me emërimin e ri të bërë nga DASH, por duket se ka dhënë një mesazh për të gjithë të prekurit nga ligji që Biden nxorri vitin që lamë pas.
Bazuar në këtë ligj, në vendin tonë ka pasur disa të ndëshkuar, përveç Tom Doshit dhe Vangjush Dakos, të cilët kanë disa vite që janë “non grata” nga SHBA. Tanimë listës së zezë të Amerikës i është bashkuar ish-kryeministri Sali Berisha, Aqif Rakipi dhe Ylli Ndroqi, të cilët akuzohen se kanë kryer korrupsion dhe kanë “minuar demokracinë” me veprimet e tyre.
