Pas përfundimit të zgjedhjeve në Francë, kanë dalë edhe exit poll-et e para. Presidenti aktual Emmanuel Macron dhe liderja e ekstremit të djathtë Marine Le Pen kanë kaluar në raundin e dytë, siç ishte parashikuar gjerësisht nga sondazhet e opinionit gjatë gjithë fushatës. Sipas mediave të huaja, kjo do të thotë se raundi i dytë është midis dy kandidatëve të njëjtë si në zgjedhjet e fundit presidenciale në 2017. Ndërsa në vendin e tretë renditet kandidati i së majtës, Jean-Luc Mélenchon, i cili kishte rreth 20% të votave.
Eric Zemmour, që është edhe kandidati i ekstremit të djathtë, ka marrë 7.2% të votave (sipas exit poll-it të Franceinfo), nuk ia doli ashtu siç pritej. Kandidatja konservatore Valérie Pécresse, me vetëm 5% të votave, ka regjistruar rezultatin më të keq për një parti kryesore të së djathtës në dekada, transmeton Franceinfo. E njëjta gjë vlen edhe për kandidaten e Partisë Socialiste të qendrës së majtë, Anne Hidalgo, e cila mori 2.1% të votave. Kandidati për të Gjelbrit, Yannick Jadot, doli pak më mirë se ata të dy, por gjithsesi doli më keq se sa pritej me 4.4% të votave.
