Gazeta italiane “Corriere della sera” publikoi sot artikullin të quajtur “Droga nga Adriatiku, mbi 1000 parcela” . Ky artikull komenton të dhënat e policisë italiane përsa i përket prodhimit të marijuanës në Shqipëri. Për këtë çeshtje ka reaguar edhe kryetari i PD-së lulzim Basha në një status në faqen e tij zyrtare ne facebook.
Në fillim të artikullit në gazetën italiane thuhet se “Të dhënat e vitit 2015 të Policisë Financiare italiane përgjatë misionit të saj në Shqipëri, i cili ka kontrolluar me anë të avionëve parcelat e fshehura të trafikantëve kanë konfirmuar dyfishimin e shtrirjes së parcelave të kanabisit në Shqipëri, prodhimi i të cilëve kapërcen 1000 ton lëndë narkotike.”
Corriere della sera vijon me shkrimin: “Parcela të dyfishuara përgjatë dy viteve, një biznes kriminal i administruar me kritere menaxheriale për të shtuar të ardhurat e një biznesi prej miliarda euro, një prodhim që kapërcen mbi 1000 ton drogë në vit, baza logjistike të spostuara në zona më pak të depërtueshme për të fshehur levat e një ingranazhi që ushqen narkotrafikun botëror, është skenari që hapet përballë rajonit të Pulias”
Nga të dhëna të Policsë financiare Italiane janë konfirmuar se në vitin 2015 janë dokumentuar 1200 parcela kanabis në Shqipëri e janë zbuluar 243 rrënjë kanabis përgjatë një misioni që ka eksploruar vetëm 15.83 % të territorit shqiptar.Këto shifra flasin për një rritje në krahasim me një vit më parë të parcelave me kanabis që në 2014 u dokumetuan 815 parcela e 165 mijë rrënjë kanabis në një mision eksplorimi prej 12.5 % të territorit shqiptar.
“Nëse në vitet 2013-2014 kryeqyteti ndërkombëtar i kanabisit ishte Lazarati”, shkruan e përditshmja italiane, “tashmë gjërat kanë ndryshuar e klanet kanë spostuar lëndën e tyre të parë e bazat logjistike në Shkodër e rrethinat e saj, ku është dhe më e vështirë për t’u kontrolluar.”
Misionet e Policisë Financiare italiane në Shqipëri kanë nisur monitorimin falë një marrëveshje dypalëshe në luftën kundër krimit të organizuar, të nënshkruar më vitin 2012.
Investiguesit kontrollojnë territorin shqiptar me avionë të tipit P166DP1 e në vendet ku dyshohet se gjenden parcela droge.
Me anë të sensorëve “Tabi e Casi”, mekanizmavefotografikë të fuqishëm prej 80 megapixel e një grupi ekspertësh të Universitetit të Napolit, bëhet e mundur hartimi i një harte që dëshmon situatën e parcelave të kanabisit në Shqipëri.
“Prodhimi i drogës është rritur e ka kapërcyer 1000 ton në vit, shkruan “Corriere dela sera”, trafikimi i saj kalon përmes Adriatikut e marijuana hidhet në tregun europian me gomone e skafe të afta për të kapërcyer brenda pak orësh kanalin e Otrantos. Por gjatë kohëve të fundit janë shtuar sekuestrimet e drogës nga ana e forcave të rendit falë dhe bashkëpunimit me autoritetet në anën tjetër të Adriatikut”.
“Corriere della Sera” mbyll artikullin duke kujtuar raportin vjetor të Departamentit të shtetit Amerikan, i cili e përkufizon Shqipërinë si “burim prodhimi i marijuanës, por dhe vend tranziti i kokainës e heroinës së tregtuar në tregjet europiane.”
