Atletet e kryeministrit Rama këtë herë janë vënë në qendër të vëmendjes së gazetës italiane Corriere Della Sera.
Kryeministri shqiptar ka veshur atlete në disa takime zyrtare duke u komentuar jo vetëm nga mediat në vend, por edhe ato botërore.
“Opozita e sulmon. Disa kolegë ndërkombëtarë e pyesin përse por publikisht ai tregon diplomaci. Shpjegimet janë ose zyrtare ose me ironi. Rama pak ditë më parë gjatë një darke me mësuesit më të mirë të vendit tha: ‘Unë jam veshur kështu për t’u solidarizuar me mësuesit e fiskulturës’. E vetmja gjë e sigurt është se Edi Rama, artist, basketbollist, udhëheqës i socialistëve dhe që nga viti 2013 Kryeministër i Shqipërisë shfaqet edhe në institucione me atlete. I vetmi politikan që vepron kështu”, shkruan gazeta italiane.
Artikulli i “Corriere Della Sera” liston disa nga takimet ndërkombëtare të Ramës ku ai ka vershur atlete.
“Ai e bëri këtë edhe në Samitin e Triestes korrikun e kaluar. Ai shtrëngoi duart me homologun italian Paolo Gentiloni, ndërsa veshur kishte “Adidasët” e tij të bardhë. Me të njëjtat atlete u takua edhe me presidentin francez Emmanuel Macron.
Me një palë të tjera, këtë herë në të zezë, ai mori pjesë në një takim të udhëheqësve të Ballkanit në Bruksel i cili zhvillohej nën kujdesin e Federica Mogherinit”, shkruan gazeta italiane.
Sipas “Corriere” analistët mendojnë Edi Rama, 53 vjeç dëshiron të përcjellë imazhin e një vendi të ri dhe dinamik.
