Manchester City ka arritur ta fitojë një ndeshje mjaft të vështirë ndaj Newcastle United me rezultatin 2 me 0, duke vazhduar ndjekjen ndaj Arsenalit kryesues të Premier League-s, ndërsa në anën tjetër mysafirët janë krizë të thellë ku në gjashtë ndeshjet e fundit nuk kanë asnjë fitore.
Për herë të fundit që “Magpies” fituan një ndeshje në kampionat ishte më 15 janar ndaj Fulham, që nga atëherë kanë pësuar tre humbje e kanë barazuar në tre ndeshje tjera.
Të besuarit e Pep Guardiolës ishin shumë superiorë në takimin e zhvilluar në “Etihad Stadium”, duke dominuar në posedim dhe raste të krijuara, por vetëm dy nga të gjitha rastet u konkretizuan në gola.
“Sky Blues” kaluan në epërsi vetëm pas një çerek ore lojë, ku Rodri i dha një top Phil Fodenit, i cili bëri disa driblime të shkëlqyera për ta përfunduar aksionin me një gol të bukur për rezultatin 1me 0.
Pjesa e parë nuk pati më gola dhe nuk dhuroi diçka për t’u veçuar në minutat në vazhdim.
Në pjesën e dytë, Manchester City shënoi edhe një herë për të dyfishuar rezultatin dhe për të pasur një siguri më të madhe në rezultat.
Kësaj radhe golashënues ishte Bernardo Silva, ndërsa në rolin e asistmenit ishte Erling Håland, për rezultatin përfundimtar 2 me 0.
Me këtë fitore, City vazhdon të mbetët në vendin e dytë, por tani me dy pikë më pak se Arsenali që ndeshjen do ta zhvillojë më vonë gjatë pasdites, ndërsa Newcastle humbi mundësinë t’i afrohet Tottenhamit të vendit të katërt, dhe do të vazhdojë të mbetët një pozicion më poshtë në renditje.
