Hekuran Billa, 40 vjeç nga Kukësi u ekzekutua me armë zjarri mbrëmjen e djeshme në mes të Tiranës, te “Komuna e Parisit”, pranë Qendrës Kristal.
Ai u gjet i vdekur brenda një makinë të bardhë tip BMW X6.
Mësohet që viktima është kthyer nga Belgjika në Shqipëri përpara pesë ditëve.
Raportohet se viktima ka patur precedentë të mëparshëm penalë.
Në vitin 2006 ai ka kryer një vrasje jashtë vendit, në Angli.
Hekuran Billa, është dënuar për vrasjen e Prel Markut, 22 vjeç, në Park Royal në Londër, më 14 tetor 2006.
Ai ka qenë i përfshirë në bandat shqiptare, të cilat operonin në fushën e trafikut të qenieve njerëzore dhe në prostitucion.
Sipas mediave të huaja, rivali i Billës ishte Petrit Brahoj, 45 vjeç.
Gjithashtu, pjesë e vrasjes së Markut ishte edhe Kujtim Spahiu, i cili u burgos me 33 vite burg.
Dy të dyshuar të tjerë që bashkëpunuan me Billën asokohe, ishin Mohamed Mehmeti dhe Lulzim Bici, të cilët ishin duke pritur në makinën e arratisjes jashtë klubit, u pastruan nga çdo përfshirje në vrasje.
Billa u ekstradua nga Anglia në Shqipëri për të vuajtur dënimin me burgim të përjetshëm.
ABC News ka mësuar se një vit më parë është liruar nga burgu i Fushë Krujës, pasi nga autoritetet është konsideruar që dënimi i tij prej 34 vitesh burg, është shlyer.
Një vit më parë Gjykata e Krujës i ka pranuar Hekuran Billës kërkesën për “lirim me kusht” dhe i ka rrëzuar “burgimin e përjetshëm”.
Ndërkohë, mësohet se Hekuran Billa është pronar i disa bizneseve në fushën e tregtisë së automjeteve të të gjitha tipeve me shumicë e pakicë, në fushën e shërbimit ndaj mjeteve të transportit duke përfshirë gjithë sektorin e mekanikës, servisit të autove, e kështu me radhë.
