Nga Gresa Hasa
Po lexoja përgjigjen që Ministrja e Kulturës i ka dhënë aktorit Robert Ndrenika dhe ajo se çka më bëri përshtypje është fakti se në fjalën e saj, znj. Kumbaro vë përpara përgjegjësisë aktorët dhe regjisorët e Teatrit Kombëtar duke i kritikuar teksa tingëllon sikur po i “kërkon llogari” për faktin që më herët kur Partia Socialiste nuk ishte në pushtet, këta të fundit s’kanë protestuar për çështje dhe probleme që sipas ministres duhej reaguar se s’bën.
Nuk di të them se sa profesionalisht etike është kjo gjë por mendoj se njerëzit reagojnë atëherë kur bëhen të ndërgjegjshëm ose kur mësojnë si të organizohen më mirë njëri me tjetrin. Ndoshta s’është fare kjo arsyeja pse më herët nuk u qenkësh protestuar dhe në fakt s’ka fort rëndësi. Artistët janë ngritur në protestë sot dhe kanë disa kërkesa për qeverinë, më kryesorja prej të cilave është transparenca në vendimarrje.
Do të ishte më e shëndetshme për këtë komunikim dypalësh nëse zonja ministre thjesht do u përgjigjej artistëve për pyetjet që ata kanë, duke lënë mënjanë kritikën e paqëndrueshme e bashkë me të edhe numërimin e punëve që qeveria -kujtoj- ka për detyrë t’i kryejë. Por teksa jemi te kritika, ku ishte opozita e asaj kohe që t’i artikulonte këto probleme në vend të qytetarëve e madje t’i shpinte ato në parlament dhe të mundohej t’iu jepte zgjidhje? Ka një arsye pse struktura shoqërore funksionon kësisoj: njerëzit zgjedhin të deleguarit e tyre që t’i përfaqësojnë.
Politikanët janë shërbëtorë të popullit që paguhen nga ky i fundit në mënyrë që sa herë diçka nuk shkon, reagimi i parë të vijë prej tyre, jo prej njerëzve një pjesë e konsiderueshme e të cilëve mund të mos kenë mjetet e duhura apo mjaftueshëm kulturë politike për të marrë një rol politik aktiv. Por mbi të gjitha, ç’punë na zgjidh që nuk është protestuar më herët apo që opozita asokohe ka qenë në gjumë?! Po protestohet sot. T’ia lëmë të shkuarën historianëve ose politologëve që do të merren me studimin e lëvizjeve shoqërore dhe ndërrimin e karrigeve.
https://www.facebook.com/gresa.hasa?lst=100001289922641%3A100002505583407%3A1518431870
