Roman Abramoviç nuk është tipi i presidentit që e tret me lehtësi një humbje 6-0 siç ishte ajo që pësoi Çelsi në fushën e Mançester Sitit. Në Angli, të gjithë janë të bindur se aventura e Mauricio Sarrit në stolin e bluve, ndonëse e nisi mjaft mirë, ka mbërritur në finish.
Thuajse të gjithë tabloidët shkruajnë se në verë ish-trajneri i Napolit do t’i thotë lamtumirë Londrës. Siç raporton “The Sun”, krerët e klubit anglez kanë gjetur zëvendësuesin dhe ai quhet Zinedin Zidan, teksa tashmë po mendojnë dhe ekipin që do t’i vënë në dispozicion ish-trajnerit të Real Madridit.
Një skuadër me elementë të një niveli të shkëlqyer, e cila duhet të jetë në gjendje të përballojë Sitin dhe Liverpulin dhe të jetë në gjendje për të ecur para në Ligën e Kampioneve, nëse blutë do të arrijnë të kualifikohen. Tabloidi britanik është argëtuar duke formuar skuadrën që do të ketë në dispozicion trajneri francez, duke nisur nga Hazar, i cili nuk do të shitet.
