Pasi qeveria ka propozuar shtyrje deri në 23 qershor të gjendjes së fatkeqësisë natyrore, vjen një reagim nga ish-deputeti i Partisë Demokratike, Oerd Bylykbashi.
Përmes një postimi në Facebook, Bylykbashi thekson se gjendja e fatkeqësisë natyrore mund të zgjatet vetëm 30 ditë, siç e përcakton edhe Kushtetuta.
MESAZHI I BYLYKBASHIT
Gjendja e jashtëzakonshme zgjatet vetëm 30 dite!
Edi Rama i propozon Parlamentit zgjatjen e gjendjes së fatkeqësisë natyrore deri më 23 qershor, plot dy muaj të tjerë.
Të gjitha vendet e tjera që sot kanë kriza të vërteta shëndetësore me qindra mijëra të sëmure e dhjetëra mijëra të vdekur si Italia, Britania, Gjermania, Franca dhe SHBA, e kanë deklaruar zgjatjen maksimumi nga 3 – 11 maj. Ka shumë që kundërshtojnë këto zgjatje masash, madje në SHBA ka protesta të mirëfillta në rrugë.
Sigurisht kushdo më pak mend në kokë, e kupton që nëpër rrugë, në tregje, supermarket, vende pune, por dhe në familje, virusi bredh lirisht dhe zgjatja duhet. Por shifrat e Edi Ramës, 609 të identifikuar me virus dhe 26 të vdekur, nuk e justifikojnë aspak zgjatjen deri në qershor kur të tjeret me kriza të vertetë shendetësorë po i zgjasin vetëm 3-4 javë. Por çështja nuk është nëse duhet zgjatur apo jo. Çështja është a ka Kryeministri të drejtë të propozojë një zgjatje sa i tekët qejfi dhe Parlamenti ta miratojë kërkesën pa kufizim?
Po nëse Qeveria i ka në xhep deputetët me gojën e mbyllur me maskë kur flet Kryeministri, a mund ta zgjasë Parlamenti afatin aq sa kërkon Kryeministri? Jo!
Afati fillestar që parashikon Kushtetuta është 30 ditë dhe shtesa nuk mund të jetë më e gjatë se afati fillestar. Kushtetuta detyron që të merren masa të jashtëzakonshme që fatkeqësia natyrore, qoftë edhe pandemia, të përballen sipas afateve. Nëse nuk mjafton, Qeveria të kërkojë në Parlament zgjatje tjetër 30-ditore, e po nuk mjaftoi shtesa e parë, të arsyetoje dhe kërkojë një tjetër. Afati shërben edhe që të matet efikasiteti i masave. Ndërkohë të mos harrojmë se janë kufizuar të drejta e liri themelore kushtetuese për shkak të gjendjes së jashtëzakonshme, e para liria e lëvizjes.
Nëse do të kishim mburojen imunitare kushtetuese, Gjykatën Kushtetuese, sot do e vendoste ajo nëse Rama, nën pretekstin e koronavirusit, mund të zgjasë gjendjen e jashtëzakonshme dhe kufizimin e lirive të shqiptarëve aq sa i leverdis pushtetit të tij edhe pse statistikat nuk e justifikojnë. Por falë Edi Ramës, Gjykata Kushtetuese u hoq si bajamet (tonsilet) e sëmura, edhe pse sot e thonë të gjithë që është më mirë t’i kurosh bajamet sesa t’i heqesh, sepse janë ndër mburojat e para në ditën kur vjen infeksioni i abuzimit me pushtetin dhe Kushtetuten.
Mos harroni Edi Rama do të përpiqet të gjëje arsye ta zgjasë gjendjen e pandemisë edhe kur ajo të jetë zhdukur tjetërkund. Nëse vendoset precedenti sot, mos u çuditni që Rama të përpiqet ta zgjasë gjendjen e jashtëzakonshme deri në një vit. Mos u çuditni as nëse në emër të emergjences së shëndetit publik, policët do t’ju masin temperaturën në hyrje të qëndrës së votimit dhe të vendosin ata nëse duhet të hyni apo jo të votoni për të vendosur kush duhet t’ju qeverisë. Kjo është epidemia tjetër që kërcënon dhe fshihet pas akteve për pushtet me akte normative të Kryeministrit, epidemia e Autokracisë. Tashmë dihet që masat mbrojese nga epidemitë merren herët dhe jo vonë.
