Mbledhja e Komisionit të Edukimit ka nisur me debate dhe tensione ditën e sotme, e tillë ka vazhduar. Pasi opozita është totalisht kundër që Butrinti të jepet me koncesion. Deputetja Ina Zhupa tha se nuk duhet në asnjë mënyrë që të votohet pro projektligjit “Për miratimin e marrëveshjes për administrimin e nënzonave të trashëgimisë kulturore dhe peizazhit kulturor, pjesë e Parkut Kombëtar të Butrintit”.
Zhupa hodhi një sërë kritikash ndaj qeverisë dhe sulmoi ashpër ministren e Kulturës, Elva Margariti. Ajo i kërkoi ministres që të japë llogari në lidhje me konfidencialitetin e marrëveshjes 10 vjeçare ndërmjet Ministrisë së Kulturës dhe Fondacionit për Menaxhimin e Butrintit përmes Partneritetit Publik-Privat. “Është e turpshme që duam të kalojmë Butrintin, të japim trashëgiminë kulturore me koncesion me një marrëveshje sekrete, kur ka dy momente që jepen kontrata sekrete: kur është sekret shtetëror dhe kur është sekret tregtar”, tha ajo.
Po ashtu, Zhupa theksoi se komisioni përgjegjës në lidhje me këtë marrëveshje duhet të ishte pikërisht Komisioni për Edukimin dhe Mjetet e Informimit Publik dhe jo komisioni i Ekonomisë.
“Butrinti nuk është çështje tregtare, nuk është mall është kultura, ky komision duhet të ishte përgjegjës. Ky komision ka qenë gjithmonë përgjegjës për Butrintin edhe kur bëhej fjalë që Mirela Kumbaro do bënte qofteritë në Butrint”
Ministrja e Kulturës, gjatë replikës së saj, siguroi se aspekti ligjor i kësaj marrëveshje është në përputhje me normativat e UNESCO-s dhe Konventën e Ramsarit. Sipas saj, synimi i fondacionit që do të administrojë Parkun dhe nënzonat përreth nuk do të jetë fitimi, dhe të ardhurat do të mbeten në arkën e Butrintit, ndërsa shteti, dhe Ministria e Kulturës nuk do ta dorëzojnë pronësinë. Në prill të këtij viti qeveria miratoi një marrëveshje mes ministrisë së Kulturës dhe Fondacionit të Menaxhimit të Butrintit për administrimin e nënzonave të trashëgimisë kulturore dhe peizazhit kulturor, pjesë e Parkut Kombëtar të Butrintit. Pas diskutimeve në komisionet parlamentare, Marrëveshja pritet të kalojë në parlament për t’u miratuar.
