I ftuar në “Tonight Ilva Tare”, Ministri i Jashtëm, Ditmir Bushati, ka pranuar me krenari se është pinjoll i një familjeje komuniste. Ai është shprehur se është pinjoll i dy prindërve komunistë, por jo i një familje me prejardhje komuniste. Kreu i diplomacisë ka sqaruar edhe akuzat ndaj tij për emërime politike në diplomaci duke mohuar të ketë ndodhur një gjë e tillë edhe pse emërimi i fundit i tij është pikërisht emërimi si ambasadore e bijës së këshiltarit të kryeministri smail Lleshi, i cili gjithashtu është pinjoll i një familjeje drejtuesish komunistë në kohën e diktaturës.
Tare: A bëhen sot emërime në administratë që dalin nga selia e PS?
Bushati: Jo, jo.
Tare: Ju vetë keni çuar emra për tu punësuar?
Bushati: Jo, rasti më konkret është kabineti im. Kabineti im si çdo kabinet Ministri përbëhet nga njerëz të cilët normalisht vinë dhe ikin me Ministrin, pra konsiderohen emërtesa politike. Dhe kabineti im e reflekton shumë qartë këtë gjë që sapo unë thashë.
Ai i është përgjigjur edhe ish-kryeministrit Berisha për të shkuarën e familjes së tij në raport me komunizmin si dhe ka thënë se gjendja aktuale politike ndikon për keq në imazhin e vendit.
Bushati: Jo, unë nuk i përkas një familje me prejardhje komuniste. Unë jam pinjoll i dy prindërve komunistë, por jo i një familje me prejardhje komuniste. Sepse familja e thashë edhe pak më parë e ka origjinën shumë të hershme, 1478, të paktën me çfarë ne kemi arritur të gjurmojmë. E thashë edhe njëherë tjetër që nëqoftëse unë jam pinjoll i një komunisti, Sali Berisha është relika e komunizmit.
Tare: A ndikon klima aktuale politike, opozita që është në rrugë me protesta?
Bushati: Natyrisht që ndikon, ne kishim një proçes siç ishte reforma territoriale që nuk ishte fare e lidhur me proçesin e integrimit europian dhe nuk ka diskutim që secili prej nesh dëshironte të kishte një debat të shëndetshëm me opozitën, diskutime shteruese dhe në fund të shkohej me një dokument të përbashkët sa i takon reformës territoriale. Nuk ka diskutim që për të gjitha reformat e karakterit shtetndërtues është krejt normale që të ketë një lloj ujdie për mënyrën sesi duhet të zhvillohen këto reforma.
Tare: Dhe ky ndikim deri ku arrin?
Bushati: E di cili është paradoksi në Shqipëri, ju jeni gazetare keni lexuar ndonjë opozitë në botë që thotë do të bllokoj parlamentin se nuk më pëlqen buxheti?
Azilkërkuesit shqiptarë që kanë ikur këtë vit nga Shqipëria, Ministri u ka vënë emërtimin nomadë ekonomik të cilët shfrytëzojnë benefitet ekonomike të vendeve të tjera dhe ikin nga vendet e tyre jo domosdoshmërisht nga varfëria.
Bushati: Këta nuk janë refugjatë, ky quhet nomadizëm ekonomik, këta janë nomadë që për shkaqe të ndryshme, kryesisht të karakterit ekonomik tentojnë të përdorin benefitet që ka sistemi i azilit në Gjermani dhe …se duhet të jemi shumë të vërtetë në këtë rast.
Tare: Nuk qëndron ky argument, se ka qenë Ambasadori gjerman po në Komisionin e Jashtëm që ka thënë se këta që po ikin janë njerëz me të ardhura të mira ekonomike, nuk po ikin nga mjerimi fare siç pretendoni ju.
Bushati: Si nuk qëndron, ishte një fenomen që vjet ka prekur Serbinë, Maqedoninë, Kosovën.
Së fundmi, Ministri Bushati i ka bërë thirrje politikës së Kosovës për të ulur tonet, t’i rikthehen debatit normal dhe ka dënuar çdo akt ekstrem në parlament me gazin lotsjellës dhe jashtë tij me arrestimet e deputetëve të opozitës.
Bushati: Situata në Kosovë natyrisht që nuk është një situatë që ndihmon funksionalitetin e shtetit dhe mbi të gjitha aftësinë e Kosovës për të qenë prezente në disa nga nismat ndërkombëtare më të rëndësishme ku normalisht për shkak të subjektivitetit juridiko-ndërkombëtar të cunguar Kosova nuk ka një aktivitet normal. Do tu bëja thirrje vëllazërisht për uljen e toneve në radhë të parë, për shmangien e ekstremiteteve jo vëtem në retorikë, por dhe në akte.
Tare: Kush ti ulë tonet, qeveria apo opozita?
Bushati: Të gjitha palët dhe kur flas për retorikë apo veprime ekstreme kam parasysh edhe molotovin apo gazin lotësjellës në parlament, edhe gazin lotësjellës ndaj përfaqësuesve legjitimë të Kosovës, sepse asnjë parti politike nuk ka vënë në pikëpyetje rezultatin dhe legjitimitetin e zgjedhjeve, legjitimitetin e këtij koalicioni pavarësisht bien apo nuk bien dakord me mënyrën sesi qeveris ky koalicion.Dhe natyrisht nuk do të preferoja dhe do të isha kundër edhe veprimeve të tjera ekstreme që kanë pasuar situatën ekstreme në parlament, siç kanë qenë burgosjet e deputetëve sepse kjo është një situatë që kapërcehet me më shumë kohezion dhe mirëkuptim politik për sakohë shqetësimi kryesor i palëve janë këto dy marrëveshje për të cilat ne folëm.
