Një ngjarje e rëndë është shënuar në orët e para të mëngjesit në Bulqizë, ku automjeti gazetarit Sami Curri është përfshirë nga flakët në rrethana ende të paqarta.
Sipas burimeve paraprake, makina ka qenë e parkuar pranë banesës së gazetarit dhe është konstatuar në flakë rreth orës 02:45 pas mesnatës. Banorë të zonës kanë njoftuar menjëherë shërbimet zjarrfikëse, të cilat kanë ndërhyrë për të shuar zjarrin, por automjeti është djegur pothuajse plotësisht.
“Jam njoftuar rreth orës 3 pa një çerek të mëngjesit që është vënë zjarr te makina, nga një komshi i katit të tretë, makina është e parkuar rreth 30 metra larg nga pallati ku unë banoj me nënën time. Fatmirësisht, pa dëme të tjera te makinat ngjitur”, shpjegon ai.
Ende nuk dihen shkaqet e këtij incidenti, ndërsa nuk përjashtohet as mundësia e një zjarrvënieje të qëllimshme, siç vetë gazetari Curri dyshon.
“Kjo gjëja është e qëllimshme dhe është totalisht me synimin për të sjellë një mesazh tek unë dhe për punën që bëj, por së pari iu them që ata që e kanë bërë këtë veprim, as nuk do të më kërcënojnë ose frikësojnë dot sepse për mua gazetaria është një mision që i shërben interesit publik dhe do të vazhdojë me çdo lloj çmimi dhe një nga çmimet kjo ishte”, shprehet ai.
Curri punon si gazetar prej 10 vitesh dhe puna e tij përqendrohet te ngjarjet rreth prokurimeve publike, monitorimit të punës së pushtetit vendor dhe drejtësisë në qarkun Dibër.
“Për mua është absolutisht e qëllimshme dhe me qëllimin kryesor për të më përcjellë mesazhin që kjo ishte e para dhe mund të vazhdojë më tej. Kjo gjë nuk më ndal dot”, thotë Curri.
Ai shton se nuk ka asnë dyshim konkret ndaj dikujt.
Policia ka mbërritur në vendngjarje dhe ka nisur hetimet për zbardhjen e plotë të rrethanave.
gijotina.com/
