Deputeti i PD-së dhe kreu i grupit parlamentar të demokratëve që janë kundër ish-kryeministrit, Sali Berisha, Enkelejd Alibeaj ka reaguar për shpalljen “non grata” nga Britania e Madhe të 27 zyrtarëve shqiptarë të lidhur me kriminalitetin dhe korrupsionin.
Ndërkohë në reagimin e tij Alibeaj shprehet se kjo konfirmon qartë të gjitha denoncimet që ka bërë PD, para gjatë dhe pas procesit të 25 prillit.
“Konfirmimi më i qartë i të gjithë denoncimeve tona, para gjatë dhe pas procesit të 25 prillit.”-shkruan Alibeaj.
Alibeaj ka zgjedhur që të shpërndajë edhe një pjesë nga mesazhi i të dërguarit special i kryeministrit britanik në Ballkanin Perëndimor Sir Stuart Peach, i cili thekson se blerja e votave dhe keqpërdorimi i fondeve publike vazhdojnë të jenë një problem madhor i politikës shqiptare. Sipas Alibeaj, këto denoncime janë bërë edhe më parë nga grupi i PD-së, i përfaqësuar nga ai sidomos lidhur me krimet zgjedhore pas procesit të 25 prillit.
“Mbështetja që disa personazhe publike marrin nga kriminelët në këmbim të korrupsionit mbyt zërin e popullit shqiptar. Siç tregon raporti i OSBE-së për monitorimin ndërkombëtar të zgjedhjeve parlamentare të vitit të kaluar, blerja e votave dhe keqpërdorimi i fondeve publike vazhdojnë të jenë një problem madhor në politikën shqiptare. Për sa kohë që politikanët janë në gjendje të punojnë me kriminelët për të blerë, shantazhuar dhe frikësuar votuesit, demokracia shqiptare do të mbetet e brishtë dhe e paplotë. Tani nevojiten ndryshime të mëtejshme dhe reforma zgjedhore.
Krimi i organizuar dhe korrupsioni në Shqipëri – dhe më gjerë në rajon – nënkuptojnë gjithashtu se shuma të mëdha fondesh shtetërore, të mbledhura nga taksapaguesit e zakonshëm, nuk arrijnë kurrë në shkollat, spitalet dhe rrugët që shqiptarëve u duhen për të ndërtuar një shoqëri të shëndetshme dhe të begatë.”-shkruan ndër të tjera Alibeaj në postimin e tij në rrjetet sociale.
