Emri i Shqipërisë u përfshi rastësisht në debatin për Brexit, daljen e Britanisë nga BE, por çfarë mendojnë dy kryeministrat e vendeve për këtë gjë është vërtetë interesante. Ndërsa kryeministri shqiptar i dha sot të drejtën vetes që ti lutet Britanisë që të rrijë në BE, kryeministri britanik e quan qesharake krahasimin e pozicionit të vendit të tij me BE-në me atë të Shqipërisë dhe vë në dukje varfërinë që e karakterizon vendin tonë.
“Është një botë shumë interesante dhe unë nuk e kisha imagjinuar asnjëherë që do më duhej të ndërhyja në një debat në Mbretërinë e Bashkuar për të qëndruarit ose jo të saj në BE dhe të shkruaja në ” The Times” dhe t’ju thoja: Ju lutem mos u largoni! Ndërkohë pjesa më mahnitëse e saj është kur morëm vesh që një ndër mëndjet më të ndritura dhe shumë inteligjente të qeverisë së Mbretërisë së Bashkuar Michael Gove’s ,sekretar i drejtësisë , një ndër kampionët e fushatës së largimit, po u thoshte anglezëve se ka një tjetër mënyrë e cila mund të jetë shumë më tepër interesante. Ikni nga BE dhe bëhuni pjesë e një klubi të ri, së bashku me Shqipërinë, Kosovën, Serbinë, Bosnjen dhe nuk e di kë tjetër. Duke ditur që zotëria e kishte seriozisht thashë: A nuk është pak e çuditshme kjo? Ndoshta jemi shumë naivë që mendojmë se BE është ai që mendojmë ne që është dhe ndoshta ju keni humbur tërësisht kapacitetin për të qenë naivë, por në këtë situatë, dua t’ju them se nuk preferoj të jem në vendin tuaj, preferoj të jem në vendin tonë. Prandaj ne preferojmë të jemi në vendin tonë e të vazhdojmë të bëhemi europianë… Edhe një herë për aq sa mund tju vijë në ndihmë ju lutem mos u largoni nga BE” u shpreh Edi Rama gjatë konferencës së NATO-s ndërsa fjala e tij u shoqërua me të qeshura dhe duartrokitje.
Por si i shohin shqiptarët në Britani? Këto ditë të fundit shqiptarët janë vënë sërish në qendër të vëmendjes, pas shpëtimit të një varke që po mbytej në La Mansh, me 18 emigrantë shqiptarë në bord.
Kryeministri David Cameron në një intervistë për mediat tha se të krahasosh Britaninë me Shqipërinë është qesharake dhe na kujton se jemi një vend dëshpërimisht i varfër.
“Në fillim thanë se duan përshtatje të tipit norvegjez, pastaj atij kanadez. Tani flasin për stilin shqiptar, sepse Shqipëria mesa duket ka një pozicion të jashtëzakonshëm tregtie në Evropë. Epo, në fakt nuk e ka. Ka kuota të eksporteve të saj të peshkut, nëse doni realisht ta dini. Por ta krahasosh Shqipërinë, një vend dëshpërimisht i varfër që po mban radhën për të hyrë në Bashkimin Evropian, me Britaninë, ekonominë e pestë më të madhe të botës, kjo është vërtet qesharake”, tha Cameron.
Në foto më poshtë perfaqesuesit e Britanisë në Asamblenë Parlamentare të NATO-s që po zhvillohet në Tiranë duke qeshur gjatë deklaratës së Ramës;
