Deputetja demokrate përcjell mesazhin që, sipas saj, ka dhënë komisioneri për Zgjerimin e BE-së, Johanes Hahn
Kryetarja e Komisionit të Integrimit, Majlinda Bregu, tha në një intervistë në Ora Neës, se mesazhi kyç i komisionerit për Zgjerimin, Johanes Hahn, ishte ai për zgjedhjet e lira dhe të ndershme si kusht për negociatat. ”Mesazhi më i mirë që komisioneri ka përcjell sot se edhe sikur reforma në Drejtësi të miratohet, Bashkimi Evropian do të vëzhgojë implementimin e saj, zgjedhjet e lira dhe të ndershme janë kusht për hapjen e negociatave, se vendimet e Gjykatës Kushtetuese duhet të zbatohen nga të gjithë”, tha Bregu.
Bregu tha gjithashtu se reforma në drejtësi duhet të kishte nisur me propozimin që bëri sot kryeministri, tryezë politike për kryerjen e reformës. Kërkesa në fjalë është bërë prej kohësh nga kreu i opozitës. Sipas saj, këtë propozim e ka bërë kohë më parë kryetari I opozitës por se nuk është marrë në konsideratë nga mazhoranca. Bregu tha se koha maksimale për të cilën Hahn tha se mund të hapen negociatat është vera e këtij viti. “Marrja e statusit për anëtarësim ka përgjegjësi më shumë. Në rast se negociatat nuk hapen gjatë këtij viti, ato mund të jenë të vështira vitin tjetër. Ka zgjedhjet në Francë, ka zgjedhje në Gjermani. Kemi një Evropë që flet pak për zgjerimin. Vështirësia do të bëhet gjithnjë e më e madhe. Qeveria mendon se mund të ketë një As në dorë për zgjedhjet e ardhshme, kjo për mua s’ka pikë rëndësie. Ne duhet të ecim jo vetëm për të kapur kohën e humbur”, tha Bregu.
