Sapo është botuar libri “Hyrje në gjuhësi”, me autorë një nga përfaqësuesit më të shquar të kulturës dhe shkencës shqiptare, prof. Anastas Dodi.
Anastas Dodi i cilësuar si autoritet shkencor nga gjuhëtarë evropianë, punimet e tij janë bazë kryesore reference për studiues shqiptarë dhe të huaj.
Në librin “Hyrje në gjuhësi” janë diskutuar disa probleme aktuale të gjuhësisë: trajtimi i zhvillimit historik të gjuhës në formacionet e ndryshme shoqërore; rrugët e formimit të gjuhëve standarde në vende të ndryshme të Evropës dhe në Shqipëri; krijimi i gjuhëve ndërkombëtare artificiale, gjuhësia kompjuterike etj. Nga drejtimet kryesore në gjuhësinë botërore në tekst është hedhur një vështrim edhe në shkollat e ndryshme gjuhësore me pikëpamjet e tyre. Në tekst i kushtohet vëmendje kontributit të N. Çomskit për gjuhësinë.
Kjo “Hyrje në gjuhësi” shquhet për faktin se për një sërë çështjesh të trajtuara në të autori ka kontribuar në vite me studime e artikuj vetjakë për sqarimin e tyre në gjuhësinë shqiptare.
Ajo përfiton nga përvoja prej pesë dekadash e autorit në hartimin (si bashkautor) e një teksti të mëparshëm të “Hyrjes në gjuhësi” dhe të teksteve të tjera mësimore e universitare, si dhe nga përvoja e jashtëzakonshme e tij si lektor i lëndëve fonetikë e gjuhës shqipe, hyrje në gjuhësi, hyrje në historinë e gjuhës shqipe, fonetikë historike, sintaksë e gjuhës shqipe etj.
Spektri i temave të kësaj vepre është ushqyer në diskutimet shkencore të autorit me përfaqësues të fushave përkatëse në qëndrimet afatgjata studimore të tij, ndër të tjera në Universitetin e Parisit (Université Sorbonne Nouvelle-Paris 3), Francë, në Universitetin e Bonit (Rheinische Friedrich-Wilhelms-Universität Bonn), Gjermani, si dhe në literaturën e pasur gjuhësore, të cilën ai e takoi në dekadën kur jetoi në Filadelfia (SHBA).
Kjo “Hyrje në gjuhësi” (e lënë në dorëshkrim nga autori) është një vepër moderne, që bëhet e afërt për lexuesin edhe nga stili i thjeshtë dhe tërheqës me të cilin është shkruar.
