Në 2015 borxhi i qeverisë u shtua me 24 për qind
Në fund të vitit 2015 borxhi i jashtëm bruto të Shqipërisë ka shkuar në 7 miliard e 630 milionë euro. Kjo vlerë është 702 milionë euro më shumë se një vit më parë. Pra e thënë ndryshe borxhi i jashtëm bruto i vendit është rritur me 9.2 për qind. Sipas shifrave më të fundit të publikuara nga Banka e Shqipërisë vetëm në tremujorin e fundit tremujori stoku i borxhit u rrit me rreth 238 milionë euro. Rreth 79 për qind e stokut të borxhit të jashtëm është borxh afatgjatë kryesisht në formën e huave, ndërsa pjesa tjetër është borxh afatshkurtër kryesisht i marrë nga sektori bankar. Mbajtësi më I madh i këtij borxhi është qeveria, e cila zotëron rreth 43 për qind të tij, ose e shprehur në vlerë është 3 miliard e 293 milion euro. Në një vit, pra gjatë 2015 borxhi i qeverisë është rritur me 504 milion euro, ose 24 për qind më shumë se një vit më parë. Borxhin e qeverisë e ka rritur edhe emetimi i eurobondit, që e rriti stokun e borxhit me 141 milionë euro.
Mbajtës të tjerë të borxhit janë sistemi bankar me rreth 1 miliard e 281 milionë euro, ose 17 për qind e totalit. Në vitin 2015 borxhi I tyre ka qenë 31 milionë euro më i lartë sesa një vit më parë. Sektorët e tjerë të ekonomisë kanë po 17 për qind të totalit të borxhit, ose në vlerë 1 miliard e 269 milionë euro. Vitin e kaluar ky borxh ka ardhur në rënie me 4 për qind krahasuar me 2014. Pjesa tjetër e borxhit është mes kompanive private dhe një për qind e tij mbahet nga Banka e Shqipërisë, që në total shkon në 1 miliard e 787 milion euro.
