Deputeti Luçiano Boçi, është shprehur se bashkimi vjen vetëm me pranimin e vendimit të gjykatës dhe rrëzimin e vendimeve të gabuara për përjashtime dhe pezullime të deputetëve.
“Dëgjova me vëmendje të gjithë kolegët. Bashkohem me shqetësimet e tyre dhe thirrjet për bashkim janë dëshira të sinqerta. Por bashkimi arrihet nëpërmjet akteve dhe proceseve. Po flasim këtu për dy procese bashkimi: Atë të grupit. Atë të bazës. Unë dua të ndërtoj një qasje tjetër. Është një proces por njeri është shkaku tjetri është pasoja. Kuvendi i 11 dhjetorit dhe 18, proceset e tjera janë pasoja. Pasoja të vendimeve të gabuara të lidershipit përfshirë ne si grup”, është shprehur Boçi.
Po ashtu ai është shprehur se çdo vendim politik duhet të kalojë nëpërmjet konsultimit të kryesisë dhe të merret si vendim në grup.
“Aktet duhet të vazhdojnë me pranimin e vendimit të gjykatës dhe tërheqjen e ankimimeve që s’prodhojnë gjë. Sikurse me pranimin e çdo anëtari grupi si të tillë duke rrëzuar çdo përjashtim e pezullim. Procesi i bashkimit në bazë, e cila na vëzhgon dhe mban qëndrime sipas pozicioneve tona, nëse ne bashkohemi, natyrshëm na ndjek në këtë proces bashkimi”, ka thënë ndër të tjerash deputeti demokrat.
Ai ka vazhduar më tej duke u shprehur se bashkimi i bazës nuk përfundon as në 30 as një javë më pas, por se ai është i vazhdueshëm.
