Deputeti i Partisë Socialiste Ben Blushi ka shfrytëzuar seancën e së enjtes duke shpërthyer në kritika ndaj kryeministrit Edi Rama duke e krahasuar këtë radhë me rivalin e tij politik, ishkryeministrin Sali Berisha. Blushi tha se Rama dhe Berisha konkurrojnë me njëri-tjetrin për borxhin e rritur, shkatërrimin e vendit dhe për padrejtësi. Sipas deputetit socialist që ka ka zgjedhur llogoren e kritikës ndaj qeverisjes së partisë së tij, në tre vite qeverisje, kryeministri Rama “nuk ka bërë punë tjetër, veçse ka lyer me bojë gërmadhën që la Berisha”.
Deputeti socialist foli dhe për aksidentin tragjik në Kavajë, ku humbën jetën dy fëmijë të vegjël, teksa po shkonin me nënën në burg, për të takuar babain. Sipas deputetit Blushi, vdekja e fëmijëve u shkaktua nga vendosja e interesit privat mbi atë publik. “Ishin hequr barrierat për t’i shërbyer një karburanti privat. Babai i fëmijëve kishte ndërtuar në tokën e vet dhe përfundoi në burg për 6 muaj. Përse ishte në burg ky njeri, shkoi në burg për një çati, humbi dhe dy fëmijët për këtë arsye”, deklaroi Blushi.
Qeverisja sipas Blushit
“Kryeministri tha se ju nëse doni të merrni një vendim shkoni të merrni votat. Një fukara që ankohet se asistenca e vet është e pamjaftueshme, duhet të bëjë një parti që të marrë vota, që të marrë një vendim. Pse kështu, vetëm kush merr vota ka të drejtë të marrë vendime në këtë vend. Herën e kaluar unë ika nga ky parlament, 4 orë foli kryetari i Rilindjes, e 4 orë ishkryetari i Lindjes, kështu po i quaj tani. E vetmja gjë që ama po bën në 3 vite, është se po lyen me bojë gërmadhën e Sali Berishën. Lyeje me çfarë të duash gërmadha gërmadhë mbetet. Ky kryetari i lindjes ka 25 vite që qeveris, drejton, quajeni si të doni, e ky tjetri i rilindjes ka 18 vite. Njësoj është. Drejtohemi nga dy të paaftë, një i djeshëm, një i sotëm. Konkurrojnë kush ka marrë më shumë borxh publik. Këta konkurrojnë kush e ka rrënuar më shumë ekonominë e Shqipërisë, kush ka shkaktuar më shumë padrejtësi. Ka ardhur koha ta themi se është konkurrencë në paaftësi. Tha sot se vijnë kinezët, e shumë mirë bëjnë që vijnë. Por pse ikin gjermanët, kanadezët. Ekonomia jonë po bie dhe ka më pak konsum. Kinezët kanë më shumë mundësi sot, dhe kanë mundësi të durojnë. Foli për pronat, por kjo çështje nuk është reformë, por deformim i asaj që mund të ishte reformë. Nuk ka ligj për kthimi e pronës, por për trajtimin e pronës. Nuk matet me metrin e së ardhmes, por me metrin e së shkuarës, krahasohet me Saliun”, tha Blushi.
