Kryetari i Këshillit Kombëtar Shqiptar, Ragmi Mustafi, i ka pritur me përzemërsi dy përfaqësuesit e Qeverisë së Kosovës, Besnik Bislimin dhe Arbërie Nagavcin, në Luginën e Preshevës.
“Z.Bislimi e Znj.Nagavci , mirësevini në Luginë të Preshevës!”, ka shkruar Mustafi në Facebook, duke bashkëngjitur edhe disa fotografi.
Ndërsa, kryetari i Preshevës Shqipërim Arifi tha se ka disa arsye pse s’do të zhvillohet takim mes tij dhe vartësve të Kryeministrit Albin Kurti, ndërsa fillimisht tha se ata nuk kanë kërkuar takim me të.
“Nuk do të takohem me ta. E kanë injoruar Komunën e Presheves dhe çdo shqiptar në Luginë. Arsye tjetër janë politikat e LVV-së, sepse unë nuk i nënshtrohem atyre dhe për shkak të kritikave të cilat i jap në kuadër të politikave të saj në dialog. I shoh të manget në koncept dhe në përfshirje të shqiptarëve në zgjidhje”, tha Arifi.
Kryetari i Preshevës tha se Qeveria Kurti II ende nuk i ka transferuar 2 milionë eurot e premtuara për Luginën e Preshevës. Qeveria e Kosovës në projektbuxhetin e vitit 2022 kishte ndarë 2 milionë euro për Luginën e Preshevës.
Nga vizitat në Preshevë dhe Bujanoc, Bislimi e Nagavci kanë planifikuar të takojnë përfaqësues politikë, personalitete të ndryshme e biznese.
