E diela është dita e familjes, e kur ata na mungojmë gjejmë mënyra se si t’i kemi sa më pranë “tavolinës”.
Vajza e Lasgushit, Marie Poradeci e ka kujtuar sot të atin përmes postimit të një letre që ai i ka shkruar së motrës.
“Ja si i shkruan në një letër Lasgushi, vajzës së tij të madhe Kostandina, në vitin 1974:
“… që të jetë njeriu vetëm duhet fuqi e madhe e zemrës, si dhe fuqi e madhe e shpirtit, them që e kam atë fuqi durimtare aq të madhe, d.m.th. aq sa më duhet për valët e jetës. Shumë herë dëshpërohem me një dëshpërim humbas kurajën, kurajën e madhe, shumë herë më ka lëshuar kurajo, po prapëseprapë kam mundur t’a marr veten, t’i kaloj valët, t’a kaloj ujin, edhe kështu, bijë e babit, jam si një gur në lumë, që uji shkon, po guri mbetet. Kjo është filozofija e babkës tënd, tjetër filozofi nuk gjeta dot, tjetër filozofi nuk kishte si të qëndroj të mos rrëzohem dhe të kaloj një çikë më tej”, ka shkruar Marie Poradeci.
