Çmimi i naftës ka shënuar një rënie të konsiderueshme në bursë teksa negociatorët ukrainas dhe ata rusë filluan një raund tjetër bisedimesh dhe pasi Zelensky u shpreh se po shohin sinjale pozitive për një armëpushim të mundshëm.
Sipas të dhënave në bursë, sot çmimi i naftës bruto ka rënë me 5% ndërsa një fuçi kushton diçka më pak se 104.4$. Vetëm tri ditë më parë fuçia ishte mbi 109 dollarë amerikanë, ndërkohë më datë 8 mars ka qenë 123.70 dollarë.
Një tjetër faktor që ka çuar në rënien e çmimit, sipas analistëve të tregjeve, është edhe futja në karantinë e 17.5 milionë njerëzve në Shenzhen të Kinës, pas shpërthimit të Covid atje. Ky rajon tashmë është i bllokuar dhe udhëtimet nuk lejohen. Sipas analistëve, karantinimi i këtyre banorëve ka sjellë uljen e çmimit pasi ka dhe një rënie kërkese nga miliona kinezë.
Ndërsa çmimi në bursa ka rënë, i lartë vijon të mbetet në vendin tonë ku deri ditën e nesërme nafta do të shitet 217 lekë për litër. Kujtojmë se çmimi arriti në stratosferë brenda një jave ku shkoi në 260 lekë, ku vetëm pasi qytetarët dolën në protestë, nafta u ul brenda natës në 243 lekë duke hedhur poshtë deklaratën e Ramës se çmimet i vendos tregu. Pasi nafta u ul brenda dy ditësh në 223 lekë, u faktua që çmimet i vendos qeveria me oligarkët dhe e gjitha ishte një abuzim i paprecedentë.
Bordi për Administrimin e Hidrokarbureve do të mblidhet sërish nesër për të vendosur një tjetër çmim për tregtimin e naftës, dhe këtë herë që faktet tregojnë qartë se çmimi në bursa është reduktuar, qeveria nuk ka asnjë zgjidhje tjetër, veçse t’i urdhërojë oligarkët të ulin çmimin, ndryshe protestat masive nuk do të ndalen.
